Benedikti XVI i ftoi besimtarët t’i lutën Zotit për udhëtimin e tij në Republikën
e Çekisë, në “zemër” të një Evrope.
(20.9.2009 RV)Gjithnjë sot, pas Lutjes së Engjëllit të Tënzot në Kastel Gandolfo,
Papa Benedikti XVI i ftoi besimtarët t’i lutën Zotit për udhëtimin e tij të ardhshëm
apostolik në Republikën e Çekisë, në “zemër” të një Evrope - tha Ati i Shenjtë - ku
është e nevojshme të “gjenden përsëri arsyet e fesë e të shpresës”. Pra siç njoftoi
personalisht Papa, nga e shtuna e ardhshme, më 26 shtator e deri të hënën më 28 shtator,
“në dashtë Zoti, do të bëjë udhëtimin apostolik në Republikën e Çekisë”. “Gjurmëve
të paraardhësit tim të dashur Gjon Palit II, i cili këtë Vend e vizitoi 3 herë, edhe
unë dua t’u shpreh nderimet e mia dëshmitarëve heroik të Ungjillit, atyre të kohëve
të lashta e atyre të kohëve të fundit, dhe t’i inkurajoi të gjithë të ecin përpara
në të vërtetën e në dashurinë ungjillore, tha Benedikti XVI. “Republika e Çekisë
gjendet gjeografikisht e historikisht në zemër të Evropës, e pasi në të kaluarën kaloi
përmes dramave të shekullit të kaluar, ka nevojë, si edhe mbarë Kontinenti Vjetër,
të gjejë përsëri arsyet e fesë e të shpresës”, vrejti Papa Racinger. Po kështu
Ati i Shenjtë kujtoi se lutja e sotme e Engjëllit të Tënzot është edhe e fundit në
Kastel Gandolfo, sepse javën e ardhshme do të jetë në udhëtimin e tij në Pragë, e
pastaj do të kthehet në Vatikan. Prandaj Papa i falënderoi e përshëndeti banorët
e Kastel Gandolfit ku kaloi një pjesë të verës e të pranishmit iu përgjigjen Atit
të Shenjtë me duartrokitje.