Papa: të shmanget laicizimi i priftërinjve e klerikalizimi i laikëve. Priftërinjtë
të mos largohen nga misioni tyre i veçantë
(17.9.2009 RV)Dallimi ndërmjet meshtarisë së përbashkët të të gjithë besimtarëve
të pagëzuar dhe meshtarisë së shuguruar të priftërinjve, një ndër pikat më të ndjeshme
të jetës së Kishës, u ripohua sot nga Papa Benedikti XVI në fjalimin e tij drejtuar
njërit prej gupeve të ipeshkvijve të Brazilit, atij të rajonit Verilindje 2, në Romë
për vizitën e tyre pesëvjeçare ‘ad Limina Apostolorum’. “Të shmanget laicizimi
i priftërinjve e klerikalizimi i laikëve”: këtë kërkoi Papa duke shpjeguar në mënyrë
të harmonishme, të drejtë e të qartë marrëdhëniet ndërmjet meshtarisë së përbashkët
të laikëve dhe meshtarisë së shuguruar të priftërinjve. Benedikti XVI e rinovoi
porosinë e tij priftërinjve të cilët i ftoi ta jetojnë me ndershmëri dhe besnikëri
mandatin e misionin e tyre meshtarak. “Është e rëndësishme - shpjegoi Papa që secili
të veprojë e të punojë në kushte dhe sipas mundësive që ka”. Prandaj “laikët le të
impenjohen në realitetin e përditshëm në forma e në fusha të ndryshme të shoqërisë,
edhe përmes pjesëmarrjes në politikë, sipas vizionit antropologjik të krishterë dhe
doktrinës shoqërore të Kishës”. Në anën tjetër “priftërinjtë - shtoi Ati i Shenjtë
Racinger - duhet t’i shmangen pjesëmarrjes së drejtpërdrejtë e personale në politikë,
sepse e kanë për mision të favorizojnë afrimin dhe bashkimin e të gjithë besimtarëve
e kështu të jenë gjithmonë pikë referimi për të gjithë”. “Të kujtojmë se misioni
i shpëtimit që Hyji Atë e deshi përmes të Birit të mishëruar, i qe besuar pastaj apostujve
dhe pasardhësve të tyre. Benedikti XVI pra i këshilloi ipeshkvijtë e Brazilit
t’i “përqendrojnë përpjekjet e tyre në mënyrë që në dioqezat e tyre të ketë thirrje
të reja”, e të veprojnë në atë mënyrë që të ketë “më shumë meshtarë e më mirë të formuar”,
duke mos harruar se “funksioni thelbësor dhe i pazëvendësueshëm i priftit është kumtimi
i Fjalës së Zotit, ai i kremtimit të Sakramenteve, para së gjithash i Eukaristisë.
Nga kjo buron edhe lutja drejtuar Krishtit që të dërgojë punëtorë në vreshtin e vet”. Duke
vlerësuar “shenjat të shumta shprese” në realitetin e sotëm e të ardhshëm të Kishës
braziliane, Papa foli për “një të ardhme që Zoti është duke përgatitur përmes
zellit e besnikërisë me çka ipeshkvijtë e ushtrojnë misionin e tyre ipeshkvnor.