Imzot Zimovski: shëndetësia dominohet jo nga etika, por nga logjika industriale. Ekziston
rreziku i një katastrofe humanitare botërore
(16.09.2009 RV)Ekziston rreziku
i një katastrofe humanitare e shëndetësore botërore: ky është shqetësimi i Papës Benedikti
XVI, që kryetari i Këshillit Papnor për Baritorinë e Shëndetit, imzot Zigmunt Zimovski
e shprehu në Kongresin Botëror të Federatës Ndërkombëtare të Framacistëve Katolikë.
Takimi u zhvillua në Poznan të Polonisë mbi temën: “Siguria e ilaçeve: etika dhe ndërgjegjia
e farmacistit”. “Në shumë zona – denoncoi prelati – mungojnë ilaçet më të domosdoshme,
asistenca bazë që garanton jetën. Shpesh, për motive ekonomike, nuk kurohen sëmundje
tipike të vendeve në zhvillim, sepse, megjithëse u shkaktojnë vdekjen miliona njerëzve,
nuk përbëjnë një treg të pasur. Disa nga këto ilaçe mund të realizohen lehtë mbi bazën
e njohurive aktuale shkencore, por nuk e shohin dritën e diellit për motive thjesht
ekonomike, pasi të sëmurët nuk kanë mundësi të mjaftueshme për t’i blerë. Duket qartë
–theksoi imzot Zimovski – se zhvillimi i ilaçeve nuk qeveriset më nga etika tradicionale
e mjekësisë, por nga logjika e industrisë”. Një problem tjetër dramatik – vazhdoi
imzot Zimvoski – është falsifikimi i ilaçeve, gjë që dëmton kryesisht fëmijët. Antibiotikë
e vaksina të rreme, me dozazh më të ulët, ose krejtësisht pa principin aktiv, shkaktojnë
dëme të rënda për shëndetin e tyre. Të shumta janë vdekjet ndër fëmijët afrikanë,
të cilët janë kuruar me ilaçe të falsifikuara, të blera edhe shtrenjtë. Sipas të dhënave
të Organizatës Botërore të Shëndetësisë, 30% e ilaçeve që shiten në Afrikën sub-sahariane,
në Juglindjen aziatike dhe në Amerikën Latine janë fallco. Kreu i dikasterit vatikanas
për shëndetësinë i ftoi farmacistët katolikë të denoncojnë pa frikë situata të tilla.
Ja ç’tha vetë imzot Zigmunt Zimovski, në mikrofonin e Radio Vatikanit: Në muajin
shkurt të vitit të ardhshëm, Këshilli Papnor për Baritorinë e Shëndetit do të kremtojë
25-vjetorin e themelimit e dëshiroj t’i ftoj të gjithë farmacistët – shoqata e persona
të veçantë – të ripërtërijnë identitetin e tyre si farmacistë katolikë dhe misionin
në shërbim të shëndetit e të jetës, duke e ushtruar gjithnjë me ndërgjegje e shkencë
profesionin e tyre. Dua edhe t’i nxis të impenjohen konkretisht për të sëmurët në
vendet në zhvillim e në veçanti, për fëmijët, që ata të marrin ilaçet për të cilat
kanë nevojë, sidomos përsa i përket luftës kundër SIDA-s, malaries e tuberkulozit.
Përveç kësaj, këtë vit kremtojmë edhe 400-vjetorin e vdekjes së Shën Gjon Leonardit,
që është Pajtori i farmacistëve: ai thoshte se Jezu Krishti është Eukaristia e me
këmbëngulje vinte theksin pikërisht në Eukaristinë si ilaçi i amshimit, nga i cili
ngushëllohemi, ushqehemi, shndërrohemi e marrim pjesë në natyrën hyjnore. Ky është
urimi e lutja jonë.