(15.9.2009 RV)Kuvendi pritet të miratojë nesër pasdite, në seancë plenare,
programin politik dhe përbërjen e kabinetit të ri qeverisës. Dekretimi i djeshëm
i anëtarëve të qeverisë së re nga ana e Presidentit të Shqipërisë, Bamir Topi, i hapi
rrugën miratimit në parlament të programit dhe përbërjes së Këshillit të Ministrave.
Rregullorja parlamentare dhe konkretisht neni 110 i saj përcakton procedurat që ndiqen
nga Kuvendi për miratimin e programit dhe kabinetit të ri qeverisës. Kryeministri
paraqet në seancë plenare programin politik dhe përbërjen e Këshillit të Ministrave.
Më pas, çdo deputet dhe grup parlamentar ka të drejtë të paraqesë pyetje për Kryeministrin
lidhur me këtë program. Pas përgjigjeve të pyetjeve, Kryetari i Kuvendit
deklaron hapjen e debatit për programin politik dhe përbërjen e Këshillit të Ministrave.
Votimi nga Kuvendi i përbërjes dhe i programit politik të Këshillit të Ministrave
është i hapur dhe me elektronikë. Kuvendi i ri i Shqipërisë, i dalë nga zgjedhjet
e 28 qershorit, i hapi punimet e legjislaturës së XVIII-të më 7 shtator, në mungesë
të deputetëve të Partisë Socialiste të opozitës. Kjo e fundit e ka kontestuar në vijimësi
rezultatin e zgjedhjeve, duke kërkuar transparencë dhe hetim parlamentar për këtë
proces.