Узда адзначыла 325-ці годдзе парафіі Узвышэньня Сьвятога Крыжа
12 верасня 2009 г. у касцёле Узвышэння Святога Крыжа ў мястэчку Узда (Дзяржынскі дэканат)
адбыліся ўрачыстыя набажэнствы з нагоды святкавання 325-гадовага юбілея парафіі. Святую
Імшу канцэлебравалі Мітрапаліт Мінска-Магілёўскі арцыбіскуп Тадэвуш Кандрусевіч і
кардынал Казімір Свёнтэк, Апостальскі адміністратар Пінскай дыяцэзіі, Мінска-Магілёўскі
арцыбіскуп на пенсіі.
Перад касцёлам вернікі хлебам і соллю сустракалі
свайго арцыпастыра, Мітрапаліта Мінска-Магілёўскага Тадэвуша Кандрусевіча, які ў працэсіі
пад гукі рубяжэвіцкага духавога аркестра ўвайшоў у касцёл. Пасля прывітальнага слова
Мітрапаліта, у якім арцыпастыр падкрэсліў важнасць падобных юбілеяў, Мітрапаліт Кандрусевіч
і кардынал Свёнтэк разам са святарамі і вернікамі ўвайшлі ў касцёл, дзе іерархаў прывіталі
дзеці, моладзь і старэйшыя парафіяне. Пасля прысутныя пачулі гісторыю парафіі.
Урачыстую
святую Імшу ў гэты дзень узначаліў кардынал Казімір Свёнтэк, а Мітрапаліт Кандрусевіч
прамовіў гамілію. Падчас гаміліі арцыпастыр падкрэсліў, што «хоць 325 гадоў — гэта
невялікі час у гісторыі чалавецтва, але ў гісторыі хрысціянства гэта ўжо значна больш,
бо складае 16 % часу існавання яго самога». «У той жа час 325 гадоў у геапалітычных
абставінах нашай зямлі — гэта вельмі шмат. Створаная 325 г. таму парафія ва Уздзе
перажыла час нашэсця войска Напалеона, першую і другую сусветныя войны, пераследы
веры», — падкрэсліў арцыпастыр.
«Невыпадкова, што тытул парафіі — Узвышэнне
Святога Крыжа. Лацінскае выслоўе кажа, што хоць зямля круціцца — змяняюцца часы і
звычаі, — але крыж заўсёды застаецца знакам нашага збаўлення», — нагадаў Мітрапаліт.
Адзначаючы,
што з дрэва крыжа, з прабітага бока Езуса Хрыста нарадзіўся Касцёл і сакрамэнты, Мітрапаліт
распавёў пра іх значэнне і цэлебрацыю, падкрэсліваючы пры гэтым, што Касцёл з’яўляецца
нашай духоўнай маці, якая нараджае нас да новага жыцця і клапоціцца пра яго.
Напрыканцы
гаміліі Мітрапаліт Кандрусевіч заклікаў вернікаў уздымаць свой позірк на крыж, як
знак збаўлення і компас жыцця, каб хрысціяне сярод многіх жыццёвых шляхоў не забываліся
той дарогі, якая вядзе да касцёла, дзе чакае Езус — адзіны Збаўца.
У сваю
чаргу кардынал Свёнтэк узгадаў урачыстасць асвячэння касцёла ва Уздзе, якая адбылася
5 гадоў таму і якую ён сам здзейсніў. «Узда мае два касцёлы і абодва яны нашы, каталіцкія»,
— сказаў іерарх, нагадваючы пра нявырашанае пытанне адносна вяртання старога драўлянага
касцёла.
На заканчэнне святой Імшы адбылося набажэнства адарацыі Крыжа,
падчас якога кожны мог ушанаваць сімвал збаўлення ўсяго чалавецтва.