Veçanërisht prekëse, vizita e Atit të Shenjtë në Shenjtëroren e Zojës së Lisit, ku
u takua me motrat e klauzurës, të ardhura nga 11 kuvendet e tjera të dioqezës. Sëbashku,
ju lutën Zojës për Pasardhësin e Shën Pjetrit e për Kishën, për Italinë, Evropën e
kontinentet e tjera, për paqen, për familjet e krishtera, për dioqezën e të gjitha
komponentet e saj, duke i kërkuar t’i ndihmojë njerëzit për të ndjekur planin e Hyjit
për ta. Ja lutja:
Virgjër Shenjte, o Zojë e Lisit, Pajtore e dioqezës
së Viterbos, të mbledhur në këtë shenjtërore që të kushtohet Ty, po
të drejtohemi me një lutje të përgjëruar e plot besim: vigjëlo mbi Pasardhësin
e Shën Pjetrit e mbi Kishën që i është besuar kujdesit të tij; vigjëlo mbi
këtë bashkësi dioqezane e mbi barinjtë e saj, mbi Italinë, Evropën dhe kontinentet
e tjera. O Mbretëreshë e paqes, ndërhy për dhuratën e pajtimit e të paqes Për
popujt e për krejt njerëzimin.
Virgjër e bindur,
o Nëna e Krishtit, që, me “po”-në tënde të urtë para shpalljes së Engjëllit, u
bëre Nëna e të Gjithpushtetshmit, ndihmoji të gjithë bijtë e tu të shkojnë sipas
planit që Ati Qiellor ka për secilin, për të bashkëpunuar në planin universal
të shëlbimit, që Krishti plotësoi duke vdekur në kryq.
Virgjër
e Nazaretit, Mbretëreshë e familjes, bëji familjet tona të krishtera djepe
të jetës ungjillore, pasuroji me dhuratën e shumë thirrjeve për
meshtari e për jetën e shuguruar. Mbaji të bashkuara familjet tona, sot
të kërcënuara nga të gjitha anët, e bëji vatra të qetësisë e të harmonisë, ku
dialogu i durueshëm të zhdukë vështirësitë dhe kundërshtitë. Vigjëlo sidomos
mbi familjet e ndara e në krizë, o Nënë e faljes dhe e pajtimit.
O
Virgjër e Papërlyer, Nënë e Kishës, ushqeje entuziazmin e të gjitha komponenteve
të dioqezës sonë: të famullive e të grupeve kishtare, të shoqatave
e të formave të reja të impenjimit apostolik që Zoti frymëzon me anë të
Shpirtit të Tij të Shenjtë; bëje të fortë e të vendosur vullnetin e atyre që
Zoti i vreshtit vazhdon t’i thërrasë si punëtorë në vreshtën e vet, që, t’i
rezistojnë çdo joshjeje e kurthi të kësaj bote, të vazhdojnë me bujari rrugën
e filluar, e, me ndihmën tënde amnore, të bëhen dëshmitarë të Krishtit të
tërhiqen nga vezullimi i Dashurisë së tij, burim gëzimi.
O
Zojë e Mëshirshme, Nëna e njerëzimit, ktheji sytë nga burrat e gratë e
kohës sonë, nga popujt e qeveritarët e tyre, nga kombet e kontinentet;
ngushëlloji ata që derdhin lot, që vuajnë, që kërkojnë drejtësi, mbështete
atë që lëkundet nga pesha e lodhjes dhe e sheh të ardhmen pa shpresë; jepi
guxim atij që punon për ndërtimin e një bote më të mirë, ku të ngadhnjejë
drejtësia e të mbretërojë vëllazërimi, ku të ndalet egoizmi e urrejtja
e dhuna. Çdo formë e shfaqje e dhunës të mundet nga forca paqtuese
e Krishtit!
O Virgjër e dëgjimit, Yll i shpresës, Nënë
e Mëshirës, burim përmes të cilit erdhi në botë Jezusi, jeta jonë
e gëzimi ynë, në Të falenderojmë e Të përtërijmë ofertën e jetës, të
sigurtë se nuk na braktis kurrë, sidomos në çastet më të errta e më të vështira
të ekzistencës. Na shoqëro gjithmonë: tash e n’fill të mortes sonë. Amen!