(04.09.2009 RV)Dhuna kundër të
krishterëve në Pakistan nuk ndalet: sulmi i fundit, dy ditë më parë në Baluçistan,
u kushtoi jetën 5 vetëve. Qeverisë pakistaneze i janë bërë shumë thirrje, nga të gjitha
anët e botës, që të sigurojë mbrojtje e mbështetje për pakicat e të shfuqizojë ligjin
mbi blasfeminë, shkak kryesor i vdekjeve për të krishterët. Pas mesazhit të Benediktit
XVI për bashkësinë e krishterë pakistaneze, solidaritet është shprehur edhe nga shumë
ipeshkvij e dioqeza të botës, të gatshme për t’i ndihmuar të krishterët në ndërtimin
e një shoqërie të rrënjosur në vlerat fetare e njerëzore. Kujtojmë se të krishterët
përbëjnë 4% të popullsisë prej 170 milion banorësh, pjesa më e madhe e së cilës është
myslimane. Të dëgjojmë një meshtar pakistanez, kombonian i dioqezës së Fasalabadit,
dëshmitar i drejtpërdrejtë i sulmit të 1 gushtit, gjatë të cilit 8 të krishterë u
dogjën të gjallë, ndërmjet tyre katër gra e dy fëmijë. Quhet atë Iftikar Mun.
Ta dëgjojmë: Të krishterët në Pakistan kanë akoma frikë. Natyrisht, qeveria
pakistaneze mundohet të na ndihmojë e të na mbështesë, por dhuna shpesh është e pakontrollueshme
e kalon përmes fanatizmit fetar. Myslimanët ekstremistë nuk humbin rast pa terrorizuar
krejt bashkësinë e krishterë, duan destabilizimin e vendit. Njerëzit kanë gjithnjë
frikë, nuk janë kurrë të sigurtë, por ne duhet të jetojmë atje, sepse ai është vendi
ynë, aty i kemi shtëpitë, punën.