Benedikti XVI pjesëmarrësve në Javën e 60-të liturgjike Italiane: Liturgjia i dëshmon
botës vlerën e Mëshirës Hyjnore.
(25.8.2009 RV)Liturgjia mund të ndikon “një guxim të ri e qëndresë të re” tek
“punëtorët e vreshtit të Zotit”. Për këtë lypet favorizuar një “përtëritje e rimarrje
të kremtimit në përdëllimin kuptimplotë të faljes së Zotit”. Këtë u porosit Papa pjesëmarrësve
të Javës liturgjike italiane që u hap dje në qytetin Barleta në jug të Italisë. Sot
më shumë se kurrë ka nevojë “për ta përjetuar dhe kremtuar Sakramentin e Pendesës
me pjekuri”, shkruan më tej në emër të Benediktit XVI kardinali Tarçizio Bertone
në mesazhin dërguar pjesëmarrësve në javën e 60-të liturgjike kombëtare. Qe pikërisht
Mesazhi i Sekretarit të Shtetit të Vatikanit Hirësisë së tij kard. Bertone ai që hapi
dje edhe punimet e kësaj mbledhjeje që organizohet çdo vit nga Qendra e Veprimit Liturgjik
e Konferencës Ipeshkvnore Italiane. Ndër tjera Papa uron që Java Liturgjike “të ndihmojë
për përtëritjen e kremtimit të Mëshirës Hyjnore dhe të përvojës domethënëse të Pajtimit”-
siç quhet ndryshe Sakramenti i Rrëfimit. Benedikti XVI, - vë në dukje Hirësia e
tij Kard. Bertone - nënvizon se është e nevojshme më shumë se kurrë që këtë vit të
përqendrohemi tek tema “Të Kremtojmë Mëshirën Hyjnore. Pranojeni Pajtimin që vjen
nga Zoti”. Ati i Shenjtë shprehet kështu edhe për një arsye tjetër, sepse sot, kur
kanë kaluar 35 vjet nga hyrja në fuqi në Kishën Italiane e Ritit të Ri të Pendesës
“do të ishte me interes të vërenim nëse përveç ndryshimit nga pikëpamja rituale është
formuar edhe një mentalitet i ri teologjik, shpirtëror e baritor”. Në veçanti,
thuhet në mesazhin e Papës Racinger që mban firmën e Sekretarit të Shtetit të Vatikanit
Bertone “një nga përparësitë baritore të kohës sonë është formimi i ndërgjegjes së
besimtarëve, sepse për fat të keq, në atë masë sa e humbasim vetëdijen për mëkatin,
po në atë masë rritet vrarja e ndërgjegjes të cilën do të donim ta asgjësonim me anë
të disa barnave qetësuese të përkohshme e të pamjaftueshme”.
Prandaj Benedikti
XVI i fton të gjithë meshtarët ta shoqërojnë me uratë Sakramentin e Pajtimit, qoftë
edhe nëpërmjet “një katekizmi paraprak dhe të një katekizmi mistagogjik për ta kuptuar
më thellë këtë Sakrament”. “Ka nevojë për mësues të urtë e të shenjtë të shpirtit”
– përfundon mesazhin e vet Benedikti XVI duke sjellë si shembull famullitarin Shën
Gjon Maria Vianej të cilit i është kushtuar edhe Viti meshtarak. Pikërisht mbi
këto tema, pra, do të flasin deri të premten kumtuesit e specialistët e ndryshëm të
ftuar në këtë ngjarje me rëndësi për Kishën.