Papa: feja e krishterë ende sot skandalizon, tërë jetën duhet të jetojmë sipas vullnetit
të Krishtit
(23.8.2009 RV)Edhe sot si në kohët e Jezusit “ jo pak persona mbesin të ‘skandalizuar’
para paradoksit të fesë së krishterë”, sepse mësimi i Krishtit “duket ‘tejet i ashpër’
dhe i vështirë për t’u pranuar”, sepse Ai “nuk mjaftohet e nuk kënaqet me pranimin
e pjesshëm, me përkatësinë sipërfaqësore, të jashtme e formale”, e të shkosh pas Tij
“sjell vështirësi e mohime” për të cilat “shpesh herë duhet shkuar kundër rrymës”
së mendësisë dhe modës së kohës. Kështu pohoi mes tjerash Papa Benedikti XVI para
lutjes së Engjëllit të Tënzot në oborrin e Pallatit Apostolik në Kastelgandolfo. Duke
përshkuar pjesën e Ungjillit të liturgjisë së kësaj së diele nga Shën Gjoni ungjilltar,
Papa pohoi se “pyetja provokuese” e fesë që asokohe Jezusi u drejtoi nxënësve të tij,
“mbërrin deri tek besimtarët dhe njerëzit e çdo epoke”. “Edhe sot - shtoi Ati i Shenjtë
Jozef Racinger - jo pak njerëz mbesin të ‘skandalizuar’ para paradoksit të fesë së
krishterë. Mësimet e Jezusit duken teje të ‘ashpra’e të vështira për t’u pranuar e
për t’u zbatuar në jetën e përditshme. Atëherë ka njerëz - vijoi Papa - që e refuzojnë
dhe braktisin Krishtin, sepse të ecësh udhës së tij e t’i përmbahesh mësimeve të tij
nuk është punë e lehtë dhe pa vështirësi: madje ka edhe njerëz të tillë që provojnë
ta përshtatin fjalën e Zotit me modat e kohëve duke e shtrembëruar e çnatyruar kuptimin
dhe vlerën e vërtetë të saj”. “Vërtetë të ndjekësh Krishtin - nënvizoi Benedikti
XVI - të mbushet zemra me gëzim dhe gjen kuptimin e ekzistencës personale, por sjell
edhe vështirësi e mohime sepse shpesh herë duhet shkuar kundërrymës” e kundër mendësisë
së botës. Për këtë pyetjes së Jezusit “ A doni të shkoni ndoshta edhe ju?”, apostujt
iu përgjigjen: “Zotëri, e tek kush të shkojmë? Ti i ke fjalët e jetës së amshuar e
ne kemi besuar e njohur se Ti je Shenjti i Hyjit”. “Të dashur vëllezër e motra - përfundoi
Papa duke iu drejtuar 4 mijë besimtarëve të pranishëm në lutje të Engjëllit të Tënzot
- edhe ne mund ta përsërisim përgjigjen e Pjetrit, sigurisht të vetëdijshëm për brishtësinë
tonë njerëzore, por plot besim në fuqinë e Shpirtit Shenjt, që shprehet e shfaqet
në bashkim me Jezusin. Nëse ia hapim zemrën me besim Krishtit, nëse lejojmë të pushtohemi
nga Ai, do ta përjetojmë edhe ne, së bashku me Shën Gjonin Maria Vianej, se lumturia
e vetme mbi këtë tokë është ta duash Zotin e të dish se Ai na do”, duke ndjekur shembullin
e “vajzës së përvujtë të Nazaretit, Nënës së Hyjit e nënës dhe modelit të të gjithë
besimtarëve”.