Rubrika ‘Me Nënë Terezën”: “Të varfërit u përkasin të gjithëve”.
(17.08.2009 RV)Vijojmë leximin
radiofonik të librit ‘Jeta ime’. Në emisionin e katërmbëdhjetë të ciklit ‘Me
Nënë Terezën’, kushtuar së Lumes, Rregulltarja e madhe na nxit t’i bëjmë vetes
disa pyetje: “A e kemi për detyrë t’i ndihmojë të varfërit? Ç’përfaqësojnë për ne?
Si sillemi me ta, kur u kalojmë pranë e i shikojmë me dorën e shtrirë? E kur i shikojmë
duke vdekur në rrugë të madhe? Mbyllim sytë? Heshtim? Dhurojmë? E ç’duhet bërë, kur
nuk kemi asgjë për të dhuruar? Të dëgjojmë përgjigjen e Nënë Terezës:
“Kur
ndokush pohon, siç pohoi një ditë kryeministri i Shtetit të Bengalës Lindore, se ‘në
vendet komuniste të varfërit duhen ndihmuar drejtpërdrejt nga shteti, e jo nga individë
të veçantë”, unë jap të njëjtën përgjigje, që dhashë asokohe: “Nuk jam fare
dakord me zotin kryeministër kur thotë se është shteti ai, që duhet të kujdeset për
të varfërit. Mendoj se duhet të kujdesemi të gjithë. Të gjithë kemi përgjegjësi për
ta. Çdo njeri duhet të përpiqet për t’ua plotësuar nevojat vëllezërve e motrave”. Kohët
e fundit isha përsëri për vizitë në shtëpitë tona në Afrikë: kryesisht në Tanzani
e në Etiopi. Arrita në Etiopi në të njëjtën kohë me presidentin kuban,
atë që e ka mjekrrën e gjatë… hë, me Fidel Kastron! Etiopia po kalonte çaste
ndryshimesh jo shumë të këndshme. Më thanë se misionarët po dëboheshin nga
vendi. Megjithatë më siguruan se kjo nuk do t’i prekte motrat e mia, sepse
ne punojmë për të varfërit. Në Etiopi mbretëronte uria. Ishte shumë më e
madhe, se ajo e viteve të thatësirës, që e provuam edhe ne, sepse erdhëm në këtë
vend pikërisht në vitin 1973, kur mungonte edhe kafshata e përditshme. Në
Etiopi Zoti po na jep një mësim shumë të çmuar: na krijon mundësinë të dhurojmë deri
në dhimbje. Njerëzit këtu janë të mrekullueshëm. S’dëgjohet asnjë
ankim. Askush nuk e ngre zërin për t’u ankuar. Aq më pak larton sytë nga
qielli për të pyetur: “Pse, o Zot, gjithë kjo vuajtje?”.Ngula këmbë që motrat
ta ndjenin veten më shumë se kurrë në dorë të Provanisë Hyjnore, me bindje se nuk
do të arrinin kurrë deri në atë pikë, sa të mos kishin më asgjë për të dhënë. Kur
lëshohesh plotësisht në dorë të Zotit, do të kesh gjithnjë diçka për të dhuruar!”.