Nata e solemnitetit të të ngjiturit të Zojës në Qiell. Papa: Maria na tregon të vetmen
gjë, për të cilën kemi nevojë.
(14.08.2009 RV)Nesër paradite, në orën 8.00, në solemnitetin e të ngjiturit
të së Lumes Mari në Qiell, Papa do të kryesojë Meshën Shenjte në famullinë e Shën
Tomës së Vilanovës, në Kastel Gandolfo. Në mesditë, takimi tradicional i Engjëllit
të Tënzot, në Oborrin e Pallatit Apostolik të qytezës laciale. Është hera e pestë
që Benedikti XVI kryeson ritet e solemnitetit të të Ngjituri të Zojës në Qiell, festa
më e lashtë mariane.
Papa na fton të kundrojmë të vërtetën ngushëlluese të
fesë, të ngjiturit e Marisë në Qiell me korp e me shpirt. Pas vuajtjes, vjen lavdia:
shndërrim drejt të cilit shkon çdo njeri e mbarë gjithësia: “Ajo, nga e cila
Zoti u mishërua, me shpirtin e shporuar nga shpata mbi Kalvar, qe e para që provoi
misterin e këtij shndërrimi, drejt të cilit shkojmë të gjithë, edhe ne shpesh herë
të shporuar nga shpatat e vuajtjeve të kësaj bote. Eva e re ndoqi pas Adamin e ri
në vuajtje, në mundime e edhe në gëzimin përfundimtar. Krishti është fryti i parë,
por korpi i tij i ngjallur nuk mund të ndahet nga ai i Nënës së Tij tokësore, Marisë,
e në Të, gjithë njerëzimi përfshihet në ngjitjen drejt Hyjit"(Homelia e
Meshës së 15 gushtit 2008). Nuk është përrallë, por realitet, mister që i zbulohet
të vegjëlve, sepse Zoti i bën krenarët ta ulin kokën, ndërsa i ngre lart të përvujturit: “Sigurisht
nuk janë arsyetimet që na bëjnë t’i kuptojmë këto realitete kaq të larta, por feja
e thjeshtë, e çiltër, e heshtja e uratës, që na na ndihmon të flasim me Zotin e të
ndjejmë sesi vetë Zoti i flet zemrës sonë”(Homelia e Meshës së 15 gushtit
2008). Një gjë e vetme është e nevojshme. E kjo festë – shpjegon Papa – na
fton të kërkojmë gjërat kryesore, pa e humbur kurrë shpresën përballë vështirësive
të jetës: “Të zënë me punët e përditshme, rrezikohemi të mendojmë se është
këtu, në këtë botë, në të cilën jemi thjesht kalimtarë, qëllimi i fundmë i jetës njerëzore.
Ndërsa është Parajsa caku i vërtetë i shtegtimit tonë tokësor. Sa të ndryshme do të
ishin ditët tona, në se do të jetoheshin në këtë perspektivë” (Engjëlli
i Tënzot i 15 gushtit 2006). Dëshmia e krishterë lind pikërisht nga të jetuarit
e fesë në mënyrë të thjeshtë, si Maria: “Përballë shfaqjes së trishtuar të
gjithë këtij gëzimi të rremë e njëkohësisht të gjithë kësaj dhimbjeje plot ankth,
që vërshon mbi botën, duhet të mësojmë nga Virgjëra Mari për t’u bërë shenja shprese
e ngushëllimi e për ta kumtuar, me jetën tonë, ngjalljen e Krishtit!” (Homelia
e Meshës së 15 gushtit 2008). Në Zulesën e Shën Gjonit Apostull Kisha personifikohet
me Marinë, që sulmohet nga një dragua i madh i kuq, simbol i pushtetit të perandorëve
romakë antikristianë, që nga Neroni te Domiciani: pushtet që dukej i pakufizuar, pushtet
ushtarak, ekonomik, politik, propagandistik: “Përballë këtij pushteti feja,
Kisha, dukej si një grua e pambrojtur, pa kurrfarë mundësie për të shpëtuar e aq më
pak, për të fituar: e kush mund t’i kundërvihej një pushteti të tillë të gjithpranishëm,
që dukej se mund të bënte gjithçka? E megjithatë e dimë se fitoi gruaja e pambrojtur,
nuk fitoi egoizmi, as urrejtja; fitoi dashuria e Hyjit e Perandoria romake ia hapi
dyert fesë së krishterë”. (Homelia e Meshës 15 gusht 2007). Duke
u ngjitur në Qiell, Maria nuk u largua nga ne, e kemi edhe më pranë e drita e saj
ndriçon jetën tonë e historinë e mbarë njerëzimit: “Të gjithë kemi
nevojë për ndihmën e saj e për ngushëllimin e saj, për të përballuar provat e sfidat
e përditshme: kemi nevojë ta ndjejmë pranë si nënë e si motër në çdo çast të jetës
sonë. E që të mund të kemi një ditë edhe ne përgjithmonë të njëjtin fat, t’i ngjasim
tani, duke ecur në rrugën e Krishtit e të shërbimit bujar ndaj vëllezërve. Kjo është
e vetmja mënyrë për ta parashijuar, në sa jemi akoma në shtegtimin tonë tokësor, gëzimin
e paqen që e jeton plotësisht kush arrin në cakun e pamort të Parajsës”. Prej
këndej, Papa kërkon ndërmjetësimin e Virgjërës për paqe në mbarë botën”. “Mbretëreshës
së paqes, që e kundrojmë në lumninë qiellore, dëshiroj t’ia besoj përsëri ankthet
e njerëzimit në çdo vend të botës së tronditur rëndë nga dhuna”.