Kisha kujtoi Shën Maksimilian Kolben, martir i kampeve naziste të shfarosjes.
(14.08.2009 RV)Në lutjen e Engjëllit të Tënzot të së dielës së kaluar, Benedikti
XVI, duke i këshilluar njerëzit e kohës sonë të mos e harrojnëZotin, reflektoi
për jetën e disa shenjtorëve, dyke u ndaluar posaçërisht tek Shën Benedikta e Kryqit
(Edit Shtain) e Shën Maksimilian Kolbe të cilët, gjatë regjimit nazist, e dëshmuan
besimin e tyre në Krishtin deri në martirizim. Po kush ishte Shën Maksimiliani? Raimondi
(ky ishte emri i pagëzimit), më vonë rregulltar françeskan konventual me emrin Maksimilian,
lindi në Zdunska-Vola në Poloni, më 7 janar 1894. Më 1939, kur gjermanët pushtuan
Poloninë, Kolbe vijonte të jetonte në kuvendin e vet. Mbajti menjëherë qëndrim të
prerë e të hapur kundra nacionalsocialistëve. U bë, kështu njeri i padëshirueshëm,
prandaj nazistët e internuan në kampin e tmerrshëm të shfarosjes të Aushvicit. Ishte
muaji shkurt i vitit 1941. Që nga kjo ditë ai nuk ishte më as Raimondi e as Atë Maksimiliani,
por numri 16. 670. Aty nga fundi i korrikut të të njëjtit vit, në sa një nga të internuarit
dënohej me vdekje, Atë Kolbe u tregua i gatshëm të zinte vendin e të dënuarit. Fali
jetën e vet, për të shpëtuar një tjetër jetë. Pas dy javë vuajtjesh të papërshkrueshme,
ai shtrinte krahun për gjilpërën me acid fenik, në sa buzët shqiptonin për herë të
fundit mbi tokë: "Të falem Mari!". Ishte nata e solemnitetit të ‘Të ngjiturit të Zojës
në qiell’ e ai nuk i kishte mbushur ende 47 vjetët. Një vit më parë, në audiencën
e përgjithshme, duke kujtuar Shën Maksimilian Maria Kolben dhe Shën Tereza Benediktën
e Kryqit (Edit Shtain), që e përfunduan me martirizim jetën e tyre tokësore në kampin
e nazist të përqendrimit, në Aushvic, Papa theksoi: “Në dukje jetët tyre mund
të konsiderohen një disfatë e vërtetë, por pikërisht në martirizimin e tyre shkëlqen
drita e dashurisë, që mund errësirën e egoizmit e të urrejtjes. Njihen si të Maksimilian
Kolbes fjalët e mëposhtme, që ai i tha në kulmin e tërbimit të persekutimit nazist:
‘Urrejtja nuk është forcë krijuese; krijuese është vetëm forca e dashurisë’. E provë
heroike e dashurisë ishte dhurimi bujar i vetvetes për shpëtimin e shokut të burgut,
të cilit i zuri vendin në bunkerin e urisë, ku edhe do të vdiste më 14 gusht 1941”.