Çelësi i fjalëve të Kishës: “Fjalët ’bashkim’ apo ‘unitet"( emisioni IV)
(13.08.2009 RV)Në emisionin e sotëm,
të dashur dëgjues, do të shpjegojmë kuptimin që merr për katolikët fjala “bashkim”,
apo “unitet”.
Pluralizmi mund të jetë pasuri, siç dëshmon tryeza apo harta
e kombeve në kapitullin 10 të Librit të Zanafillës, ose siç shihet në karizmat e ndryshme
dhënë njerëzve nga Shpirti Shenjt, por mund të jetë edhe përçarje e ndarje, siç paraqitet
simbolikisht me Kullën e Babelit. Jo më kot, Rrëshajët e krishtera përbëjnë ribashkimin
e njerëzve rreth fesë. Uniteti është karakteristikë e Hyjit, i cili nuk është shumë
zota, por një Zot i vetëm, që ka lindur një Bir të vetëm, duke e ruajtur njëninë e
vet. Uniteti duhet të jetë si rrjedhojë, edhe shenja dalluese e bashkësisë së besimtarëve.
Nuk është unitet për qëllime strategjike, por bashkim i vërtetë, dhuratë hyjnore,
që i ka rrënjët te Krishti e te Zoti: “Unë jam në Atin tim, ju në mua e unë në ju…Banoni
në mua sikurse edhe unë në ju… Kush mbetet në mua e unë në të, ai jep shumë fryt”
(Gjoni 14,20; 15,4-5). E lutja që Jezusi i bën Atit në mbrëmjen e fundit të jetës
së tij tokësore vë në pah dëshirën e Krishtit që të gjithë ata që besojnë në Të të
jenë një gjë e vetme, si Ati me Birin. Shën Pali Apostull, duke kritikuar përçarjen
e Kishës së Korintit, i fton besimtarët të flasin njëlloj, duke marrë shembull Krishtin,
të cilin e gjejmë në Eukaristi. Në fakt në Letrën e parë drejtuar Korintianëve, shën
Pali nënvizon: “Pasi është një bukë e vetme, ne edhe pse shumë, jemi një trup i vetëm:
pse të gjithë jemi pjestarë të një buke” (10,17). E Apostulli i Popujve e shtrin
këtë koncept edhe mbi jetën e Kishës. Ajo është korpi i Krishtit, pra prania e tij
shëlbuese e aktive në histori. Kisha përmban në vetvete dy përmasa të lidhura ngushtë
me njëra-tjetrën. Është unitet në veprim, por edhe shumëllojshmëri organike, pasi
të shumta janë gjymtyrët e saj. Shën Pali fton që të ndërtohet uniteti, pa krijuar
një bllok monolit, që do të kishte natyrën e një guri të ftohtë e jo të një krijese
të gjallë. Për këtë, ai ngre në qiell dashurinë, si burim i unitetit dhe i pluralizmit.
Vetëm kështu, Kisha nuk kalon në anarkinë e individualiteteve e të egoizmave, por
edhe nuk bllokohet në një bashkim mbytës, pa jetë, karakteristik për diktaturën. Kur
flasim për një Kishë të vetme, ky është kuptimi i unitetit të saj. Është dhurata e
dashurisë së Zotit, që e bën Kishën një, pavarësisht nga shumëllojshmëria e karizmave
dhe e popujve që e përbëjnë. Prandaj, të meditojmë para fjalëve të Letrës drejtuar
Efesianëve: “S’ka por një Trup të vetëm dhe një Shpirt të vetëm, një shpresë të vetme,
një fe, një pagëzim, një Hyj të vetëm, Atin e të gjithëve”.