(10.08.2009 RV)Në leximin radiofonik të librit ‘Jeta ime’, përmes ciklit
të emisioneve ‘Me Nënë Terezën’, kushtuar së Lumes shqiptare ndodhemi përballë
konceptit tejet të ndërlikuar të varfërisë. Ç’do të thotë varfëri? Kush mund të quhet
vërtetë i varfër? Njeriu lind i varfër, apo bëhet; dëshiron apo nuk dëshiron të jetë
i varfër; e zgjedh vetë këtë rrugë apo i imponohet? Ç’qëndrim duhet mbajtur ndaj të
varfërve të natyrave të ndryshme? Në emisionin e nëntë, që titullohet: ‘Pyetje mbi
varfërinë” e Lumja Terezë përgjigjet: “Motrave të mia u them se
kam dëshirë që, duke jetuar në varfëri të plotë, të provojnë atë ‘lumturi të përsosur’,
që pati provuar Shën Françesku i Asisit, i cili e thërriste “Zonja varfëri”. Ndërsa
për Injacin e Lojolës ishte ‘Nëna Varfëri”. Sa më shumë kemi, aq më pak
mund të japim. Më mirë të kesh pak, që ta dhurosh gjithçka për Jezusin.
Për ne, të praktikosh varfërinë, do të thotë t’i qepim veshjet tona sa
më mirë që të jetë e mundur. Të endesh rrugëve me sarin e grisur, nuk është,
sigurisht, simbol i virtytit të varfërisë. Ne – u them motrave të mia –
nuk bëjmë kushtin e varfërisë së lypsarëve, por të varfërisë së Krishtit. Nuk duhet
të harrojmë edhe se trupi ynë është tempull i Shpirtit Shenjt e se, për këtë arsye,
duhet respektuar, duke veshur rroba të denja, të vjetra ndoshta, por të arnuara sa
më mirë. U them motrave se një nga arsyet për të cilat të varfërit janë
të mëdhenj e se duhet ta ndjemë vetën shumë mirënjohëse ndaj tyre, është fakti që
na pranojnë. E kjo, sepse po të mos na pranonin, ne nuk do të ishim ‘Misionare
të Bamirësisë”. Përpiqem të shqyrtoj në se varfëria e motrave përkon fjalë
për fjalë me kushtetutën tonë. Ua kujtoj posaçërisht eproreve të shtëpive. Nuk
është aspak e vështirë t’i shmangesh varfërisë. Mjafton një hap i vogël, për një largim
të madh. Kur hapim shtëpi të reja në vendet e pazhvilluara, ndonëse zakonisht
shkojmë e ngulim në zonat më të varfëra, ngulmoj gjithnjë e me të gjitha forcat për
respektimin e kushtit të varfërisë. U them shpesh atyre që na mikpresin:
“Po jua besoj motrat e mia. Kini kujdes për to e ndihmojini ta mbajnë kushtin e varfërisë,
sepse varfëria është paja jonë. Mos lejoni t’u zbehet dashuria për varfërinë”. Një
njeri i shquar i Nju Delhit, duke përmenduar motrat tona, pati thënë: “Ç’
shfaqje mahnitëse t’i shikosh motrat plotësisht të çliruara nga bota, në një kohë
kur kush nuk e jeton çastin aktual, shikohet si njeri jashtë mode”. Mungesa
e burimeve ekonomike nuk na pengon kurrë për hapjen e shtëpive, në të cilën vlejnë
kushtet, jo orenditë. Po kujtoj vetëm një shembull. Një herë morëm një letër
nga Koreja e Jugut. Na siguronte se puna e motrave do të ishte tejet e nevojshme në
një dioqezë, por sqarohej edhe se ipeshkvi ishte tepër i varfër e nuk mund të na jepte
gjë prej gjëje për të hapur shtëpinë e re. Natyrisht e hapëm shtëpinë, ku
motrat vijojnë të punojnë.Ngul këmbë përsëri: mungesa e mjeteve materiale nuk
na ka penguar asnjëherë. Mjetet arrijnë gjithnjë në kohën e duhur, me rrugë nga më
të ndryshmet, nga më të çuditshmet e më të papriturat! Mendon Tjetërkush për to!".