(10.08.2009 RV)Vijon dhuna në Irak. Së paku katër atentate tronditën sot paradite
Vendin e Gjirit. Patën si pasojë vdekjen e 46 personave e plagosjen e 217 të tjerëve.
Qytetet më të goditura nga dhuna janë Bagdadi e Mosuli. Ngjarja më tragjike ishte
ajo e Khaznanit, një fshat pranë zonës së trazuar veriore të Niniveh: u hodhën në
erë dy tanke me lëndë shpërthyese, që vranë më se 30 vetë e plagosen 31 të tjerë.
U bënë rrafsh me tokën rreth 40 shtëpi, që ngriheshin pranë xhamisë shiite e cila,
me sa duket, ishte objektivi i vërtetë i këtij sulmi. Në Bagdad dy autobomba patën
si shënjestër dy grupe punëtorësh mëditës, të mbledhur në vendet e përditshme, prej
nga shpërndahen sipas kërkesave. Punëtorët e sulmuar ishin të gjithë shiitë. Atentatet
e sotme tregojnë qartë se në vend po rifillon edhe dhuna ndërkonfesionale, ndërsa
vijon prej kohe ajo antikristiane.