(08.08.2009 RV)Sipas njoftimit të agjensive kryesore të lajmeve, frika nga
mundësia e përhapjes së gripit A/H1N1, i cili dje shkaktoi të vdekurin e parë në
Iran, i bindi autoritetet e Republikës Islamike ta ndalojë, për herë të parë, shtegtimin
në Mekë. Ndalohet si Umra, që njihet si shtegtimi i vogël e që bëhet me 22 gusht e
më 19 shtator, gjatë Ramazanit (muaj i agjërimit e i flijimit), ashtu edhe haxhillëku
i muajit nëntor. Njoftimin e dha Ministri i shëndetësisë, Mohamad Bager Lankarani,
i shqetësuar nga përhapja e sëmundjes, që deri tani ka prekur mbi 144 vetë. Teherani
druhet se prania e miliona shtegtarëve në Mekë, mund ta shtojë rrezikun e përhapjes
së virusit. Vetë Arabia Saudite i ftoi, pak ditë më parë, myslimanët nën moshën
12 vjeçare e mbi 65 vjeç, e sidomos të sëmurët, ta shtyjnë shtegtimin e madh, Haxhinë,
që njihet si një nga pesë shtyllat e Islamit.