Լուրեր քրիստոնեայ աշխարհէն - Իրաքի Հայոց Առաջնորդին Հովուական Այցելութիւնը Պասրա։
Լուրեր քրիստոնեայ աշխարհէն - Իրաքի Հայոց Առաջնորդին Հովուական Այցելութիւնը Պասրա։
Իրաքի
հայոց առաջնորդ տէր Աւագ արք. Ասատուրեան հովուական այցելութիւն մը տուած է երկրի հարաւային
շրջանի միակ հայաշատ քաղաքը՝ Պասրա, ընկերակցութեամբ թեմի Ազգային կեդրոնական վարչութեան
ատենապետ Պարոյր Յակոբեանի եւ անդամ Իշխան Ամիրխանեանի:
Անոնք դիմաւորուած են
տեղւոյն հոգեւոր հովիւ Թորգոմ քհնյ. Թորգոմեանի եւ Թաղական խորհուրդի անդամներուն կողմէ:
Սրբազան
հայրը հանդիպում ունեցած է տեղւոյն երիտասարդութեան հետ եւ խօսած զանոնք հետաքրքրող նիւթերուն
մասին՝ յորդորելով անոնց Աւետարանի պատգամով առաջնորդուիլ ու կառչած մնալ մեր հաւատքի
աւանդական ցուցմունքներուն:
առաջնորդ հայրը եւ Ազգային կեդրոնական երկու վարչականները
երկարատեւ ժողով գումարեցին տեղւոյն թաղականներուն հետ, օրակարգի վրայ ունենալով ներկայ
պայմանները դիմակայող համայնքին գլխաւոր հարցերը: Նշենք, որ Պասրայի համայնքը ներկայիս
կը հաշուէ 800 անձ:
Նոյն օրը երեկոյեան, առաջնորդը այցելեց համայնքի հիւանդներուն
եւ տարեցներուն բնակարանները: Ապա ներկայ գտնուեցաւ քաղաքի միակ հայկական հաստատութեան՝
Պասրայի Հայ երկսեռ երիտասարդաց միութեան կեդրոնը, ուր հաւաքուած էին համայնքի զաւակները՝
առաջնորդը պատշաճօրէն պատուելու եւ անոր Հայրական պատգամը լսելու:
Ձեռնարկին գործադրուեցաւ
գրական-գեղարուեստական յայտագիր՝ խմբերգ, մեներգ, նուագ եւ արտասանութիւն: Աւարտին առաջնորդ
սրբազանը, շնորհակալութեան իր խօսքին մէջ, պատուիրեց համայնքի զաւակներուն հաւատարիմ
հաւատացեալներ ըլլալ իրենց մայր եկեղեցւոյն եւ պահապան մնալ իրենց մայրենի լեզուին ու
մշակոյթին: Նաեւ ազդարարեց նեցուկ կանգնիլ սոյն մշակութային միութեան, ի նպաստ համայնքի
գոյատեւման:
Օծում Արիզոնայի Սքացտէյլ Քաղաքի Ս. Աբգար Եկեղեցիին։
Կիրակի,
Սեպտեմբեր 20ին, թեմակալ առաջնորդ Յովնան արք. Տէրտէրեան պիտի պատարագէ Սքացտէյլի Ս.
Աբգար Հայց. եկեղեցիին մէջ: Ս. սեղանին պիտի սպասարկեն ծուխի հոգեւոր հովիւ Զաքարիա քհնյ.
Սարիբէկեանը եւ սարկաւագները:
Դպրաց դասի երգեցողութիւնը պիտի կատարէ առաջնորդանիստ
Մայր տաճարի «Խաչատուրեան» երգչախումբը՝ ղեկավարութեամբ Ստեփան սրկ. Կէօզիւմեանի: Սրբազան
հայրը, ըստ Հայց. եկեղեցւոյ ծէսի եւ կանոններու, պիտի կատարէ Ս. Աբգար եկեղեցւոյ օծումը:
Յայտնենք, թէ առաջնորդը եկեղեցւոյ Նաւակատիքի արարողութիւնը կատարեց Ապրիլ 11ին: