Një satelit shqiptar për kontrollin e territorit

(05.08.2009 RV) Diametralisht i kundërt lajmi i dytë nga Shqipëria. Vërtet Tirana nuk është në gjendje të bëjë analiza virale, por nga ana tjetër është e gatshme të hedhë në orbitë satelitin e parë për kontrollin e territorit. Me nismën e Politeknikut të Torinos dhe me bashkëpunimin e shkencëtarëve shqiptarë po studiohen mundësitë për të realizuar së shpejti një satelit që të kontrollojë pyjet për ndonjë zjarr, dëborën mbi male, fenomenet e erozionit të bregdetit dhe ndotjen e territorit. Nga Departamenti i Klimatologjisë dhe Ambientit në Politeknikun e Tiranës bëjnë të ditur se sateliti mund të kontrollojë edhe Malin e Zi, Maqedoninë, Kosovën, veriun e Greqisë dhe Puljen në Itali. Sateliti do të ndërtohet nga ndërmarrje ndërkombëtare dhe hedhja e tij në orbitë mund të bëhet nga Kolorado në SHBA. Ideja do të realizohet vetëm nëse përveç qeverisë shqiptare, edhe vendet e rajonet fqinje do të mbështesin projektin.