Shqipëri: KQZ nesër shpall rezultatin përfundimtar të zgjedhjeve të 28 qershorit
(31.7.2009 RV)Komisioni Qendror i Zgjedhjeve(KQZ) mblidhet paraditen e së shtunës
(ora 11:00) për shpalljen e rezultatit përfundimtar të zgjedhjeve parlamentare të
28 qershorit. KQZ miratoi katër ditë më parë 59 mandatet e fundit të deputetëve
për Qarqet e Tiranës, Shkodrës dhe Fierit, duke e bërë thuajse gati rezultatin zyrtar
të zgjedhjeve të 28 qershorit. Kryetari i KQZ-së, Arben Ristani, duke
iu referuar një neni të Kodit Zgjedhor, tha se Komisioni është i detyruar ta shtyjë
edhe me 5 ditë të tjera deklarimin zyrtar të rezultateve zgjedhore me shifra, mandate
dhe tabela. KQZ përmbylli më 27 korrik procesin e ndarjes së mandateve sipas
koalicioneve dhe shpalljen e 140 kandidatëve fitues në 12 qarqet e vendit, ndërkohë
që rezultati përfundimtar i zgjedhjeve parlamentare të 28 qershorit u vendos të shpallej
zyrtarisht më 1 Gusht. Sipas rezultateve të KQZ-së, koalicioni "Aleanca
e Ndryshimit", i kryesuar nga PD, është fitues me 70 mandate, koalicioni "Aleanca
Socialiste për Integrim", i drejtuar nga LSI ka marrë 4 mandate dhe koalicioni "Bashkimi
për Ndryshim", i udhëhequr nga PS, fiton 66 mandate. Ndërsa ndarja e mandateve
sipas partive politike është: Partia Demokratike fiton 68 mandate, Partia Socialiste
65 mandate, Lëvizja Socialiste për Integrim, 4 mandate, Partia për Drejtësi dhe Integrim
1, Partia Republikane 1 dhe Partia Bashkimi për të Drejtat e Njeriut 1 mandat. nga
ATSH-ja