Mjetet e informimit të mbarë botës i kushtojnë vëmendje mesazhit të Papës: 'Nëse do
paqën, ruaje gjithësinë'.
(30.07.2009 RV)Dje mjetet e informimit
të mbarë botës, i kushtuan vëmendje të veçantë fjalëve të Benediktit XVI “Nëse do
paqën mbro planetin.” botuar në Mesazhin e Papës për Ditën Botërore të Paqës 2010.
Është kjo një temë me rëndësi të madhe për të gjithë njerëzimin, dhe Benedikti XVI
flet aty për “përgjegjësi globale” dhe për nevojën që vendet e pasura dhe të varfëra
“të veprojnë së bashku me qëllim që të vendosin së bashku për fatin e gjithësisë.
Kësaj teme Papa i ka kushtuar edhe katër kapituj të enciklikës së tij të fundit “Caritas
in Veritate”.
Paqja është e lidhur ngushtësisht me respektimin e mjedisit
dhe të njeriut. Papa i bashkon këto dy tema në mënyrë që asnjëra të mos shmanget siç
mund të jetë për shembull konsiderimi i natyrës si një tabu më e rëndësishme sesa
vetë njeriu, një lloj paganizmi i ri panteist, apo përkundrazi si ajo tjetra që kërkon
“teknicizimin” e natyrës duke e shfrytëzuar sipas dëshirës dhe pa kriter.
“Sot – thuhet në enciklikën e Papës Racinger – shumë dëme dhe pengesa për zhvillimin
vijnë pikërisht nga këto koncepte të gabuara. Por paqja është në rrezik mbi të gjitha
nga mungesa e drejtësisë. Kjo do të thotë se bota, krejt planeti, pra, është një dhuratë
e Zotit për të gjithë njerëzimin dhe kur disa shtete apo shumëkombëshe shtijnë në
dorë burime energjitike të parinovueshme, kjo gjë përbën një pengesë serioze për zhvillimin
e vendeve të varfëra dhe kjo të çon tek lufta”. Më tej në enciklikën e tij Papa thotë
se gjithashtu edhe çështja e ujit mund të shkaktojë konflikte serioze. Në
Mesazhin e Ditës Botërore të Paqës 2010 Papa Racinger, duke folur më hollësisht mbi
këto tema që i ka cekur edhe tek enciklika e fundit, fton shoqërinë e sotme ta rishikojë
edhe një herë dhe madje më seriozisht mënyrën e jetesës, mënyrë kjo që në shumë anë
të botës ka prirje drejt hedonismit dhe konsumizmit duke u treguar indiferente ndaj
dëmeve që këto prije shkaktojnë. “Kisha - thotë më tej Benedikti XVI tek enciklika
“Caritas in Veritate” ka përgjegjësi për gjithësinë dhe duhet ta pohojë këtë përgjegjësi
haptas. Duke e pohuar atë nuk duhet të mbrojë vetëm tokën, ujin dhe ajrin si dhurata
që iu përkasin të gjithëve, por duhet të mbrojë mbi të gjitha njeriun, kundër shkatërrimit
që vjen nga vetë njeriu. “Për të mbrojtur natyrën – vë në dukje Papa Racinger – problemi
themelor është qëndrimi moral i përgjithshëm i shoqërisë. Nëse nuk respektohet e drejta
e jetës dhe e vdekjes së natyrshme, nëse të zënit e njeriut, trajtimi dhe lindja e
tij bëhet diçka artificiale, nëse embrionet njerëzore sakrifikohen për kërkimet shkencore,
atëherë ndërgjegja e përbashkët e humbet konceptin e ekologjisë njerëzore dhe bashkë
me të humbet edhe konceptin e ekologjisë mjedisore” - vazhdon Papa. “Libri
i natyrës është një dhe i pandashëm si përsa i përket mjedisit, ashtu edhe përsa i
përket jetës, seksualitetit, martesës, familjes dhe marrëdhënieve shoqërore, me një
fjalë zhvillimit të plotë njerëzor. Është një kontradiktë tepër e madhe – vë në dukje
Papa Benedikti XVI – të kërkosh respektimin e mjedisit natyror kur “edukatat dhe ligjet”
nuk e mbështesin respektimin e qenies njerëzore. Ky është vizioni i krishterë për
ekologjinë, prandaj, nënvizon Benedikti XVI në mesazhin e Ditës Botërore të Paqës
2010, nëse do të kultivosh paqën mbro gjithësinë.