Біскупскі дэвіз Тадэвуша Кандрусевіча Quis ut Deus — Хто ж як Бог. Віншуем Яго Экселенцыю Тадэвуша з 20-годдзем адданага служэння Богу і чалавеку у святасці біскупскай сакры

25 ліпеня 1989 г. Свяцейшы Айцец Ян Павел ІІ найменаваў ксяндза Тадэвуша Кандрусевіча тытулярным біскупам Гіпона-Дзарыцкім і Апостальскім Адміністратарам Мінскай дыяцэзіі для католікаў у Беларусі. Біскупскае пасвячанне у базыліцы св. Пятра ў Рыме узначаліў Папа Ян Павел ІІ (у кастрычніку 89-га). Падчас першага этапу свайго біскупскага служэння ў Беларусі біскуп Тадэвуш Кандрусевіч заснаваў Гродзенскую вышэйшую духоўную семінарыю, спрыяў вяртанню і адкрыццю каля 100 раней зачыненых касцёлаў, прычыніўся да выдання «Парадку Імшы» і «Катэхізісу» на беларускай мове, распачаўшы такім чынам справу адраджэння Касцёла ў Беларусі, з поспехам працягнутую далей кардыналам Казімірам Свёнткам. 1 верасня 2007 г. Святы Айцец Бэнэдыкт XVI вызваліў арцыбіскупа Тадэвуша Кандрусевіча ад пастырскага кіраўніцтва архідыяцэзіяй Маці Божай у Маскве і менаваў яго арцыбіскупам Мітрапалітам Мінска-Магілёўскім, з чым мы віншуем усіх беларусаў. Прыгадаем, што арцыбіскупам Тадэвуш Кандрусевіч быў намінаваны 13 красавіка 1991 г. і тады ж прызначаны Апостальскім Адміністратарам для католікаў лацінскага абраду еўрапейскай часткі Расіі. За час яго біскупскага служэння ў Расіі ў Міністэрстве юстыцыі РФ была афіцыйна зарэгістравана Апостальская Адміністратура для католікаў лацінскага абраду, што дало ёй правы юрыдычнай асобы; была праведзена юрыдычная рэгістрацыя вялікай колькасці адноўленых парафій і іншых касцёльных структураў па цэлай Расіі. Пасля падзелу Адміністратуры 23 лістапада 1999 г. прызначаны Апостальскім Адміністратарам для католікаў лацінскага абраду Поўначы еўрапейскай часткі Расіі.