(26.7.2009 RV)Sot e diel 26 korrik,
sipas kalendarit liturgjik, Kisha katolike kremtoi të dielën e 17-të gjatë vitit
kishtar e po sot me 26 korrik, kalendari kishtar përkujtoi edhe festën e Shën
Joakimit e Shën Anës, prindërve të Zojës së Bekuar, gjyshit e gjyshes së Jezusit,
që së bashku me të drejtët e Izraelit e prisnin ardhjen e Mesisë. Nesër, e hënë
27 korrik, kalendari kishtar përkujton Shën Pantaleonin, mjek e martir dhe
Shën Çelestinin, papë. Liturgjia e ditës na kujton shëmbëlltyrën ungjillore të
farëhedhësit. Secili nga ne duhet të marrë pjesë në këtë hedhje të farës së mirë të
dashurisë, mirëkuptimit e paqes, pa menduar për cilësinë e arës, por për ‘mirësinë’
e farës. Të martën e ardhshme më 28 korrik kalendari kishtar përkujton
Shenjtorët Urbanin II e Vitorin papë, Nazarin e Çelsit, martirë milanezë dhe Shën
Ezekielin profet. Liturgjia e festës së tyre na kujtojnë se shëmbëlltyra ungjillore
e egjrës, e mbjell në të njëjtën arë me grurin e mirë, është simbol i padurimit të
atyre që e konsiderojnë veten të mirë, ndërsa për të tjerët e kërkojnë ndërhyrjen
e menjëhershme të drejtësisë së Zotit, i cili, ndërkaq, kohët e veta i rregullon me
orën e mëshirës e jo të ndëshkimit.Një farë e vogël mund të shndërrohet në pemë të
madhe; pakëz tharm e tharmë gjithë brumin. Nuk duhet ta gjykojmë mbretërinë e qiellit
nga dukja, sepse veprat e Hyjit janë të paparashikueshme. Të mërkurën
më 29 korrik, kalendari kishtar do të përkujton Shën Martën, dishepulle e Zotit.
Liturgjia e kësaj dite na kujton se Krishti nuk i dënon punët me të cilat merret Marta,
sepse edhe ai vetë ka nevojë për to, por dëshiron të nënvizojë praninë e tij, të cilën
mund ta zbehë shqetësimi për ta pritur sa më mirë. Të enjten e ardhshme
me 30 korrik, sipas kalendarit kishtar do të kremtohen Shën Pjetër Krizologu,
ipeshkëv i Ravenës e dijetar i Kishës dhe Shenjtorët Abdon e Senen, martirë. Na
kujtojnë se mbretëria e qiellit është një thesar me vlera të pallogaritshme, që nuk
duhet nënvleftësuar. Kush ka fatin ta gjejë, duhet të bëjë çmos ta shfrytëzojë për
vete e për të tjerët. Liturgjia e së premtes me 31 korrik, në
festën e Shën Injacit të Lojolës, meshtar, themelues i Shoqërisë së Jezusit,
na kujton simbolet tipike të krishterimit: peshkatarin, peshkun e peshkimin. Peshkatari
e di se në rrjetë nuk zihen vetëm peshq të mirë; ka edhe të këqij, që duhen ndarë
nga të mirët. Rëndësi ka të jesh ndërmjet peshqve të mirë. Të shtunën
që vjen me 1 gusht, do të kremtohen Shën Alfons Maria de’ Liguori, ipeshkëv
e dijetar i Kishës, themelues i Kongregatës të të Shëlbuemit, 7 Shenjtorët vëllezër
Makabej dhe i lumi Pjetër Favre, jezuit. Na kujtojnë se shpesh herë planet tona
nuk përkojnë me planet e Zotit, të cilave duhet t’u nënshtrohemi pa fjalë, sepse janë
plane shëlbimi.
Të dielën e ardhshme më 2 gusht, kalendari liturgjik i Kishës
do të kremtojë të dielën e 18-të gjatë vitit kishtar e po më 2 gusht bie edhe
përkujtimi i Shën Euzebit, ipeshkëv i Verçelit, Shën Pjetrit Gjuliani Eimard, themelues
i Sakramentinëve dhe Shën Shtjefnit papë. Liturgjia e festës së tyre na kujtojnë
se në mbarim të jetës sonë, kur do të prekim bregun jetës tjetër, vetë Zoti do t’i
marrë në duart e tij veprat tona të mira. Atje do të vijnë edhe engjëjt e do të pastrojnë,
bashkë me Të, atë çka nuk është pastruar plotësisht në jetën tonë. E në dorë të Zotit
do të mbetet vetëm dashuria e jetuar dhe e dëshmuar ndaj të afërmit.