Pas 92 vjetësh, në Rusi rikthehet mësimi i fesë në shkolla
(25.07.2009 RV)Në shkollat e Federatës
Ruse rikthehet ora e fesë, pas 92 vjetësh mungese, 70 prej të cilave nën diktaturën
komuniste. Studimi i kësaj lënde do të nisë fillimisht në 18 rajone e në 12 mijë institute
e do të bëhet mbi bazë vullnetare. Nxënësit mund të zgjedhin si alternativë lëndën
e “etikës së kulturës laike”. Mbi këtë vendim të qeverisë ruse, të dëgjojmë kryeipeshkvin
e Moskës, imzot Paolo Pecin: Komenti i parë është se ky ligj është pritur
pozitivisht. Një ligj që parashikon se aty ku ka pakica fetare të caktuara – pra jo
ortodokse – të jepet mundësia e mësimit të fesë së tyre. Kjo ka të bëjë, sidomos në
disa zona, me mësimin e fesë islamike dhe asaj budiste. E përsa i përket fesë
katolike? Faktikisht, si pakicë, nuk hyjmë në një plan zyrtar mësimdhënie të
fesë katolike. Nëse në ndonjë shkollë prania e nxënësve katolike do të jetë e tillë,
që të justifikojë formimin e një grupi, po vlerësojmë që ta kërkojmë këtë mundësi. Cilat
janë kushtet që sollën këtë vendim? A ekziston ndonjë emergjencë edukative, së cilës
qeveria dëshiron t’i përgjigjet? Besoj se kjo është arësyeja kryesore, pra
nevoja e edukimit të rinisë, nevoja për t’u dhënë të rinjve një perspektivë bindëse
për jetën. Në tokën e komunizmit, ku u mbollën e dhanë fryte teoritë e Marksit,
sot pranohet se feja nuk është opium për popujt… Kjo tashmë, pranohet prej
kohësh. Nuk është më një qëndrim ideologjik i përhapur. Sot, ekziston dëshira për
të kërkuar, edhe tek feja, kuptimin e jetës. Në këtë drejtim duhet të shihet edhe
kthimi i mësimit të fesë në shkolla. Ky pra mund të jetë hapi i parë i rëndësishëm
edhe për bashkësinë katolike ruse, apo jo? E konsideroj gjithsesi, një fakt
të rëndësishëm. Megjithëse ne nuk jemi përfshirë drejtpërdrejt në të, do të nënvizoja
se ne mund të japim kontributin tonë me anë të përvojës në mësimin e fesë katolike,
që kemi në vendet e tjera, për të arritur më pas, në institute, shkolla me të vërtetë
të krishtera, që kanë në qendër formimin e tërësishëm të njeriut. Sot, nuk ekziston
asnjë paragjykim ndaj Kishës Katolike e ky mund të jetë çasti i përshtatshëm për të
çuar përpara këtë lloj projekti.