Në Shqipëri nuk ka asnjë rast i prekut nga gripi A(H1N1)
(20.7.2009 RV)Shqipëria nuk është prekur nga virusi i gripit A (H1N1), por
nisur nga fakti se vendi ynë është i rrethuar nga shtete fqinje ku ky virus është
është prezent, ministrja e Shëndetësisë, Anila Godo u shpreh të hënën se "mund të
themi se pandemia po na troket tek porta". Znj. Godo inspektoi sot pasdite
urgjencën e Tiranës, duke e vlerësuar këtë shërbim si shumë të rëndësishëm pasi është
pritësi i parë i pacientit dhe që vendos për atë që do të bëhet më pas me të. Ajo
bisedoi me drejtuesit dhe stafin mjekësor të Urgjencës mbi masat e marra lidhur me
situatën e virusit A (H1N1), me qëllim që shërbimi të jetë në efiçencë dhe cilësinë
më të plotë. Ministrja e Shëndetësisë informoi për mediat se strukturat shëndetësore
në të gjithë vendin kanë rritur vigjilencën për kapjen e hershme të virusit A (H1N1),
i njohur ndryshe si gripi i derrit, ndërsa siguroi se autoritetet shëndetësore në
vend disponojnë antiviralin "Tamiflu". Ajo nënvizoi se nga shfaqja e këtij virusi
në botë, në Shqipëri janë analizuar rreth 80 raste të dyshuara, të cilat kanë rezultuar
negative. "Duke marrë parasysh faktin se jemi të rrethuar nga shtete, ku është
prezent pandemia dhe duke qenë se jemi në periudhën e verës, që shoqërohet me lëvizje
të shumta të popullatës në vend apo emigrantëve, mund të themi se pandemia po na troket
tek porta", theksoi ministrja Godo. Udhëzimet e fundit të Organizatës Botërore
të Shëndetësisë kërkojnë të rritet vigjilenca lidhur me rastet e dyshuara me grip
në përgjithësi, si dhe për gripin A (H1N1) në veçanti. Tashmë, virusi nuk mund të
ndalohet në kufij, ndaj edhe gjatë sezonit të verës, specialistët e ISHP-së po bëjnë
survejancën e gripit. Marrja e monstrave për analizimin e rasteve tashmë është shtrirë
jo vetëm në spitale, por dhe tek mjekët e familjes. Ditët e fundit, mjekët
e familjes janë trajnuar për marrjen e monstrave të virusit A (H1N1) dhe vendosjen
e tyre në kushte laboratorike të konservuara. Në Spitalin Infektiv, në Qendrën
Spitalore Universitare "Nënë Tereza" në Tiranë, janë siguruar ambiente të veçanta
në rast të shfaqjes së virusit në vend. Ndërkohë, gjatë kësaj jave në çdo pavion do
të sigurohet një dhomë e veçantë për izolimin e përkohshëm nëse ka raste të tilla.
QSUT ka sasinë e nevojshme të tamiflusë, por edhe gjithë preparatet e tjera ndihmëse
për veprim në rrugët respiratore, apo që janë pjesë e medikimit të përgjithshëm të
pacientëve. Nga ana tjetër, specialistët e shëndetit publik u bëjnë apel
qytetarëve të mos shqetësohen, por dhe të mos neglizhojnë rekomandimet e mjekëve.
Në rast të shfaqjes së shenjave gripale, specialistët rekomandojnë se qytetarët duhet
të drejtohen menjëherë tek mjeku.Nga ATSH-ja