Iran:reformistët kërkojnë referendum mbi Ahmedinexhadin
(20.07.2009 RV)Irani gjithnjë e
më tepër në vorbullën e problemeve. Një grup reformistësh, të udhëhequr nga ish-presidenti
Mohamad Khatami, kërkoi sot organizimin e një referendumi mbi zgjedhjet e fundit,
duke nënvizuar se “miliona iranianë kanë humbur besimin tek procesi zgjedhor”.
Mbi bazën e Kushtetutës së Iranit, vetëm udhëheqësi suprem, ajatollahu Ali Khamenei
mund të japë udhërin për referendumin, por sot Khamenei vazhdoi të akuzojë të ashtuquajturit
“armiq të jashtëm” për protestat, që pasuan zgjedhjet presidenciale të 12 qershorit.
A ka gjasa që të bëhet ky referendum? Pyetëm pedagogun e Gjeopolitikës, të kulturës
dhe të qytetërimit të Lindjes së Mesme në Universitetin katolik të Zemrës së Krishtit
në Milano, Rikardo Redaeli: Për momentin duken të pakta. Nuk e di madje
nëse një referendum mbi rezultatet e zgjedhjeve është i pranueshëm, apo jo. Është
interesant të vërehet se një pjesë gjithnjë në rritje e klerit shiit e sheh me shqetësim
rrugën që ka marrë Republika Islamike e Iranit e sidomos, kritikon gjithnjë e më me
vendosmëri veprimet e Rahbarit, apo të udhëheqësit suprem, ajatollah Khamenei. Një
udhëheqës që ka edhe funksionin e arbitrit, të ndërmjetësuesit në mosmarrëveshje,
por që e ka tradhëtuar këtë detyrë duke mbështetur pa rezerva Ahmadinexhadin. Sot,
Khamenei akuzoi sërish “armiqtë e jashtëm”… Akuza e ndërhyrjes, e komploteve
të jashtme është një nga temat më të preferuara për Ali Khamenein dhe ultraradikalët.
Ata shkatërruan lëvizjen reformiste në Iran, e cila ka pasur presidencën nga 1998
deri më 2005, duke ushqyer pikërisht frikën për ndërhyrje të jashtme. Për hir të së
vërtetës, duhet thënë se ekziston një vëmendje e jashtëzakonshme për ç’ndodh në Iran,
për arësye të rolit të vendit në Lindjen e Mesme, për programin bërthamor, për të
cilin iranianët nuk flasin hapur etj.. E gjithë kjo tërheq vëmendjen e bashkësisë
ndërkombëtare, por u ofron konservatorëve argumenta për të akuzuar reformistët dhe
ata që kundërshtojnë manipulimet e zgjedhjeve si “të dërguar nga Perëndimi”, armiq
të Republikës Islamike.