Papa është mirë. Nesër shkon në Romano Kanaveze për Engjëllin e Tënzot
(18.07.2009 RV)Papa Benedikti XVI kaloi një natë të qetë, pas aksidentit që
e çoi dje në spitalin e Aostës, ku i vunë në vend kyçin e thyer të dorës së djathtë.
Është konfirmuar edhe vizita e tij e nesërme në Romano Kanaveze, vendlindja e Sekretarit
të Shtetit të Vatikanit, kardinal Tarçizio Bertone. Pikërisht në shtëpinë atnore të
tij, Papa do të shkojë për vizitë e do të takohet me krejt familjen e përbërë nga
rreth 40 vetë, mes vëllezërve, nipave dhe stërnipave të kardinalit. “Nuk është
hera e parë që shohim Papën – tregon vëllai i kardinal Bertones, Valeriano. Kur im
vëlla u bë kardinal, Ati i Shenjtë na priti të gjithëve në Kastelgandolfo, por sigurisht
është gjithnjë një emocion i thellë, megjithëse na vjen keq që nuk mund të jetë babai,
i cili ishte shumë fetar e do ta kishte vlerësuar thellë vizitën e Shenjtërisë së
Tij, nuk do të jenë nëna e katër vëllezër që s’janë më mes nesh. Do të na mungojë
edhe Paolo, më i madhi, që fatkeqësisht nuk është mirë e prej tre muajsh është i shtruar
në spital”. Papa do të shkojë në Romano Kanaveze me helikopter nga Vale d’Aosta,
pastaj, pasi të përshëndesë fëmijët e të sëmurët në kishën famullitare do të thotë
Lutjen e Engjëllit të Tënzot në sheshin Ruxhia e në këmbë, do të shkojë në shtëpinë
atnore të kardinalit-sekretar të Shtetit të Vatikanit.