Refugjatët e krishterë të Pakistanit përjashtohen nga shpërblimet qeveritare për rindërtimin.
(18.07.2009 RV)Refugjatët e krishterë të luginës së Svatit e të zonës Malakand,
nuk po i marrin ndihmat e premtuara nga qeveria. E denoncon këtë e përditshmja Pakistan
Christian Post, që kërkon trajtim të barabartë për miliona të shpërngulur, pa bërë
asnjë dallim të tipit fetar. Më 13 korrikun e kaluar Islamabadi nisi procedurat për
rikthimin e tyre. Kryeministri Jusaf Raza Gilani shpjegoi se ushtria e kreu me sukses
operacionin për zhdukjen e talebanëve nga Bonier, Dir, lugina e Svatit e fshatrat
e zonës së Malakandit. Edhe disa zona të tjera, posaçërisht ato në kufi me Afganistanin
– janë tashmë të sigurta e refugjatët mund të rikthehen në shtëpitë e tyre. Për të
nxitur rikthimin në jetën normale, qeveria ka caktuar një shumë prej 25 mijë rupiesh
(rreth 230 euro), si dëmshpërblim për familjet e dëmtuara nga lufta ndërmjet ushtrisë
e talebanëve. Veprimtaria për rikthimin e refugjatëve nisi së pari në kampin e Mardanit,
ku familjeve të gatshme për udhë, iu dorëzua shuma e caktuar, si ndihmë për rindërtimin
e shtëpive. Pakistan Christian Post nënvizon se në kampet qeveritare të refugjatëve,
numri i të krishterëve nuk është i madh. Numërohen vetëm 60 grupe familjare, që kanë
fituar statusin e refugjatit nga qeveria: të gjithë të regjistruar pranë qendrës së
strehimit të Mardanit, ngritur nga Kisha pakistaneze. Por refugjatët e krishterë nuk
janë kaq pak: janë me mijëra e të gjithë të strehuar nga familjarët e miqtë në vijën
kufitare veri-perëndimore e në Punxhab. Ata rrezikohen të mbeten pa kurrfarë dëmshpërblimi.
Gjatë javëve të fundit AziaNjuz denoncoi se ekziston një pabarazi e dukshme në trajtimin
e të krishterëve, viktima të luftës, të cilët u dëbuan nga kampet për shkak të fesë
e vijojnë të persekutohen në njëmijë mënyra. Prandaj Karitasi, Kisha katolike e Pakistanit
dhe organizatat e tjera të krishtera, po dërgojnë ndihma në të holla, në ushqime e
sende të tjera të domosdoshme për jetën, të cilat po u shpërndahen si të krishterëve,
ashtu edhe myslimanëve, pa kurrfarë dallimi. Nazir Bhati, president i Pakistanit,
shpreh shqetësimin e tij për pabarazinë në trajtimin e njerëzve me fe të ndryshme
e kërkon nga qeveria t’u sigurohet dëmshpërblimi edhe refugjatëve të krishterë, strehuar
pranë farefisit.