«Пакліканыя да адзінай надзеі ў Хрысце» — так гучыць дэвіз XIII нарады Канферэнцыі
Еўрапейскіх Цэркваў, якая адбываецца 15–21 ліпеня 2009 г. у Ліёне (Францыя). Форум
галоўнай экуменічнай арганізацыі еўрапейскага кантыненту адбываецца ў 50–ю гадавіну
яе ўтварэння. Праца і сустрэчы членаў канферэнцыі будуць праходзіць не толькі ў
цэнтры кангрэсаў, але і ў розных святынях: у санктуарыі св. Бонавэнтуры (адкрыццё
сустрэчы), у катэдры св. Яна Хрысціцеля (экуменічныя Нешпары 18 ліпеня з удзелам арцыбіскупа
Ліёнскага кардынала Філіпа Барбарэна і Канстанцінопальскага Патрыярха Барталамея І),
а таксама супольная начная малітва з братамі з супольнасці Тэзэ. На дадзены момант
Канферэнцыя Еўрапейскіх Цэркваў аб’ядноўвае прадстаўнікоў 130 некаталіцкіх Цэркваў
і супольнасцяў з 40 краінаў кантыненту. Каталіцкі Касцёл не належыць да гэтай арганізацыі,
але цесна з ёй супрацоўнічае. Галоўнай мэтай стварэння і існавання канферэнцыі
з’яўляецца клопат аб прымірэнні Цэркваў і народаў, імкненне да адзінства ў духу экуменізму,
а таксама ўзаемапаразуменне як на еўрапейскім кантыненце, так і ва ўсім свеце. Канферэнцыя
Еўрапейскіх Цэркваў была створана ў 1959 г. Паводле свайго статуту, яна з’яўляецца
«экуменічнай супольнасцю Цэркваў Еўропы, якія прызнаюць, што Езус Хрыстус — Бог і
Збаўца згодна са Святым Пісаннем, і з гэтай мэтай прыкладвае намаганні для таго, каб
разам адказаць на сваё супольнае пакліканне праслаўляць адзінага Бога, Айца і Сына
і Духа Святога».