Selia e Shenjtë u kujton të gjithëve të mos harrohen të varfërit në botë. Fjalim i
imzot Tomazit në OKB.
(15.07.2009 RV)“Të gjinden rrugëzgjidhje për krizën ekonomike, që lindi nga
etja për para dhe nga mungesa e përgjegjësisë etike”: kjo është sfida, që duhet përballuar
për lindjen e një modeli të ri të zhvillimit global. E nënvizoi imzot Silvano Tomazi,
Vëzhgues i përhershëm i Selisë së Shenjtë pranë Kombeve të Bashkuara në Gjenevë, në
një fjalim të hollësishëm para Këshillit ekonomik e shoqëror të OKB-së (Ecosoc), mbledhur
këto ditë në qytetin helvetik. “Kriza ekonomike globale vijon të peshojë pa mëshirë
mbi njerëzit e varfër – theksoi kryeipeshkvi Tomazi – duke cituar parashikimet e Bankës
Botërore: në vitin 2009 më se 65 milionë vetë do të katandisen në varfëri të plotë
e të uriturit kronikë do të arrijnë në 1 miliard, turma të tëra njerëzish të varfër,
që rrezikohen të marrin sëmundje, si kronike, ashtu edhe ngjitëse, siç është gripi
A, i shkaktuar nga një virus deri tani i panjohur. Kjo panoramë – nënvizoi përfaqësuesi
i Selisë së Shenjtë – nxjerr në pah lidhjen e ngushtë ndërmjet varfërisë e shëndetit
si dhe barrën e padurueshme, të shpërpjestuar, që rëndon mbi kurrizin e vendeve të
prapambetura, ku shëndetësia publike, edhe kështu e ligësht, nuk do të jetë në gjendje
t’u përgjigjet nevojave të qytetarëve të varfër, në se do të detyrohet të përballojë
edhe pakësimin e ndihmave humanitare. Ja pra, pse – vërejti prelati – ndihma për zhvillim
jo vetëm që nuk duhet pakësuar, por përkundrazi, duhet shtuar, duke e parë jo vetëm
si shprehje të solidaritetit, por kryesisht si çështje drejtësie. Në se veprimtaria
ekonomike – përfundoi prelati, duke cituar Enciklikën e Papës ‘Caritas in Veritate”
– nuk mund t’i zgjidhë të gjitha problemet shoqërore përmes logjikës së tregut, që
duhet vënë në shërbim të së mirës së përbashkët, për të cilën duhet të kujdeset posaçërisht
e sidomos bashkësia politike, atëherë duhet të rinisemi nga këndvështrimi etik i zhvillimit
global, që ka në qendër të vëmendjes njeriun e jo fitimin e që ka parasysh nevojat
e dëshirat e mbarë familjes njerëzore.