З 7 па 12 ліпеня адбылася XV юбілейная штогадовая пілігрымка Віцебск-Полацак. Сёлета
яна праходзіла пад дэвізам “Крыж Хрыста – знак любові”. Удзел у пілігрымцы ўзялі вернікі
Грэка-Каталіцкай Царквы з усіх куткоў Беларусі. Па традыцыі, сярод удзельнікаў былі
таксама рыма-каталікі і праваслаўныя. Падчас Пілігрымкі была наладжана
праца ў групах дзяленьня, дзе можна было паразважаць і падзяліцца сваім духоўным вопытам
і перажываньнямі, зьвязаннымі з агульнай тэмай пілігрымкі “Крыж Хрыста – знак любові”.
На месцах начоўкі пілігрымамі былі падрыхтаванныя канцэрты духоўнай музыкі для мясцовага
насельніцтва. Канечным пунктам Пілігрымкі быў горад Полацак, куды пілігрымы
прыйшлі ў суботу 11 ліпеня пад вечар і дзе ў саборы Сьвятой Сафіі маглі паслухаць
канцэрт духоўных песьняў у выкананьні міжпарафіяльнага хора “Прасфара”.
Увечары ў суботу у храме сьв. Параскевы Полацкай была адслужаная Вячэрня з Ліцьцёй
і асьвячэньнем хлебаў. На Вячэрні сьпяваў таксама хор “Прасфара” з Менску.
Нядзеля – 12 ліпеня – была ў Полацкай грэка-каталіцкай парафіі днем сьвята. Сьвятаваўся
Ўспамін сьвятых мучанікаў Барыса і Глеба. Гэта быў таксама Дзень малітвы за Бацькаўшчыну.
Боскую Літургію, што была адслужаная ля храму сьв. Параскевы Полацкай, узначаліў Апостальскі
Візітатар для грэка-католікаў Беларусі Архімандрыт Сяргей (Гаек) у саслужэньні сьвятароў
з розных парафіяў БГКЦ, у тым ліку протапрэзьбітараў Цэнтральна-заходняга і Усходняга
дэканатаў - а. Андрэя Абламейка і а. Зьміцера Грышана. А пасьля Боскай
Літургіі вернікі мелі магчымасьць ушанаваць часьцінку дрэва Пачэснага Крыжа Гасподняга
У сьвяточнай Літургіі ўдзельнічалі вернікі Полацкай парафіі, госьці з Расеі, Украіны,
Італіі, Бельгіі, Польшчы, а таксама пілігрымы з розных парафіяў БГКЦ, у тым ліку скаўты
з нашай парафіі Праведнага Язэпа.
У братэрскай атмасфэры шчыра і ўрачыста гучала
літургічная малітва:
За Богам сьцеражоную краіну нашу Беларусь і ўвесь
беларускі народ, За стойкасьць у веры, мужнасьць у выпрабаваньнях і вернасьць
свайму народу ўсіх нас Госпаду Прмолімся” - Госпадзе , зьмілуйся.