Një tjetër meshtar spanjoll vritet në Kubë. Ishte rektori i seminarit marian të Regla-s.
(14.07.2009 RV)Një meshtar dioçezan spanjoll u vra në Kubë. Bëhet fjalë për
Dom Mariano Arrojo Merino. Ishte 74 vjeç dhe gjindej në Havanë që prej 1997 dhe ishte
rektori e famullitari i Shenjtnores së Zojës së Regla-s ku edhe ndodhi vrasja. Sipas
zëdhënësit të Konferencës ipeshkvnore kubane në trupin e famullitarit kishte plagë
të shkaktuara nga armë të ftohta si edhe shenja djegieje. Dom Arrojo të dielën kishte
kremtuar meshën si zakonisht dhe pas pak ditësh do të nisej për pushime në Spanjë.
Kryeipeshkvi i Havanës nënvizoi në një komunikatë se famullitari zhvillonte një aktivitet
baritor shumë intensiv, dhe kishte karizëm të posaçme për besimin fetar të thjeshtë,
të popullit dhe për sinkretizmin fetar.” “Jemi të gjithë të tmerruar sepse ai ishte
një person që e donin të gjithë.” - tha për ANSA Huana Ledo, një besimtare e famullisë. Dom
Arrojo është meshtari i dytë spanjoll që vritet brenda pesë muajsh pas vrasjes së
Atë Eduardo de la Fuente Serrano, i cili u gjet i therur në një rrugë të Havanës. Zëdhënësi
i Komisionit kuban për të drejtat e njeriut dhe pajtimin kombëtar, Elizardo Sançez
pohoi gjithnjë sipas ANSA-s se vrasjet e dy meshtarëve janë fakte shumë të rënda.