Papa fillon pushimet në Lë Kombë të Vale d’Aostës: dashuri, lule e poezi për t’i uruar
mirëseardhjen.
(13.07.2009 RV)Një orë fluturimi
me avion e një gjysëm ore me helikopter mbi panoramën madhështore të masivit të Malit
të Bardhë, që sundon gjithë zonën e vogël malore të Lë Kombë! Këtu arriti sot Papa,
për të pushuar dy javë, deri më 29 korrik. Pas ndalimit prej një gjysëm ore në aeroportin
Kasele të Torinos, Ati i Shenjtë ishte në vendpushim rreth orës 12. 40. Për ta pritur
kishin dalë ipeshkvi i Aostës, Gjuzepe Anfonsi; kryetari i bashkisë, Osvaldo Noudin
e, sidomos popullsia vendase, në festë për arritjen e mysafirit të shumëdashur, pas
dy vjet mungese. Të pranishëm edhe gazetarët në këtë kornizë të arritjes së Papës
në Lë Kombë. Një prej tyre, Salvatore Maca, i dërguar i gazetës italiane ‘Avvenire’
për të ndjekur pushimet papnore, na e përshkruan kështu, nga Vale d’Aosta , pritjen
që iu bë Benediktit XVI:
Përgjigje: - Ishte një pritje shumë
e ngrohtë: të pranishëm, si zakonisht, të gjithë fqinjët e shtëpisë së Papës, pastaj
fëmijët e kopshtit komunal të Introdit, që e përshëndetën kush me një vjershë e kush
me një tufë lule. Atmosferë feste. Pastaj njëri nga banorët, sapo Papa vuri këmbën
e parë në tokë, e pyeti: “Jeni i kënaqur që u kthyet?”. E Benedikti XVI iu përgjigj:
“Sigurisht! Këtu gjithçka është shumë e bukur. Përndryshe, nuk do të isha kthyer”.
Ndërsa ipeshkvi i Aostës, Imzot Anfonsi, duke pasur parasysh se
popullsia vendase, që ka privilegjin të presë për të trembëdhjetën herë një papë,
e rrethon atë me kujdes e dashuri, në mikrofonin tonë pohon:
Përgjigje:
- Është shumë e thjeshtë: populli ynë nuk e ka zakon të vrapojë, të shqetësohet
e të shkojë t’i shqetësojë edhe të tjerët. Besoj se do të sillemi kështu: në se Papa
dëshiron të vijë tek ne - e ja që erdhi, sepse këtu gjen pushim e kushte shumë të
përshtatshme për punë - mirëse të vijë! Nga ana ime, kërkova një pjesëmarrje sa më
të madhe në lutjen e Engjëllit të Tënzot të së dielës së ardhshme.
E ky
do të jetë edhe takimi i parë masiv i Papës me popullsinë e këtyre viseve të mrekullueshme,
plot blerim e freski, ku ndodhet tëbana prej guri e druri, përhumbur mes pyjeve pafund
të Lë Kombë, ku Papa tani po kalon çastet e para të pushimeve verore.