Koment i Atë Lombardit për atmosferën dhe përmbajtjen e takimit të Benediktit XVI
me Obamën.
(12.07.2009 RV)Mbrojtja e jetës,
paqja në Lindjen e Mesme, kriza ekonomike dhe dialogu ndërfetar – ishin disa nga temat,
që u prekën në takimin e parë të Benediktit XVI me Barak Obamën, i cili u prit pasditen
e së premtes së kaluar, në Vatikan, së bashku me të shoqen, Mishelë, të bijat e grupin
shoqërues. Për atmosferën dhe përmbajtjen e këtij takimi, të ndjekim drejtorin
tonë të përgjithshëm, zëdhënës i Vatikanit, Atë Federiko Lombardin, në mikrofonin
tonë:
Përgjigje: - U krijua një frymë përzemërsie, kënaqësie
ndërmjet dy bashkëbiseduesve, që munden të njihen personalisht, të takohen të kenë
mundësinë për të dialoguar, për t’u shprehur e për ta dëgjuar drejtpërdrejt njëri-tjetrin.
Ky është gjithnjë hap përpara në marrëdhëniet ndërmjet njerëzve e, në këtë rast, ndërmjet
njerëzve që kanë autoritet të madh e rëndësi të madhe në rrugën e njerëzmit.
Pyetje:
- Në këtë rast, dhuratat flasin e thonë shumë: Papa i dhuroi Obamës Enciklikën
‘Caritas in Veritate”, por edhe Dokumentin e Kongregatës për Doktrinën e Fesë “Dignitas
Personæ” …
Përgjigje: - Sigurisht! Enciklika fton për ta rimenduar
projektin kulturor të zhvillimit të vërtetë të njerëzimit e prandaj Papa dha kontributin
e vet. Njëkohësisht, siç e dimë, në Amerikën e sotme zhvillohet një debat i madh për
vlerat themelore të mbrojtjes së jetës e, në këtë perspektivë, ndërmjet Kishës e politikës
së presidentit Obama ka ndryshime, madje të ndjeshme. Fakti që Papa i dhuroi dokumentin
“Dignitas Personæ”, shprehja më e plotë e më e thelluar e mendimit katolik mbi etikën
e jetës, është shumë domethënëse. Papa i bëri presidentit disa propozime, në mënyrë
të qartë e të ndershme, të cilat u pritën me shumë respekt, edhe pse pastaj duhet
parë e duhet vlerësuar në se këto kërkesa do të respektohen apo jo.
Pyetje:
- Sidoqoftë presidenti një impenjim e mori në mbrojtje të jetës…
Përgjigje:
- Po, ripohoi atë që e pati thënë edhe më parë: se ka për qëllim, me impenjimin
e qeverisë, ta kufizojë sa më shumë që të jetë e mundur numrin e aborteve. Ky është
impenjim, që duhet vlerësuar. Nuk plotëson gjithë këndvështrimin e Kishës mbi problemin,
por sigurisht, duke pasur parasysh realitetin e plagës së rëndë të abortit, është
padyshim një impenjim pozitiv, të cilin ai e pohoi në takimin me Atin e Shenjtë, në
sa Papa po i shprehte shqetësimin e thellë të Kishës për jetën njerëzore.
Pyetje:
- Bilanci që mund të bëhet për një ngjarje kaq të rëndësishme?
Përgjigje:
- Bilanci natyrisht është pozitiv. U arrit pikërisht ajo që prisnim e shpresonim,
dmth u tregua se ekziston mundësia për të filluar një dialog plot përgjegjësi, përballë
problemeve të rënda të njerëzimit të sotëm e të nesërm, e presidenti Obama dëshmoi
se është në gjendje të ofrojë aftësi krijuese e personalitet, që ngjall shpresa e
krijon besim për kërkimin e rrugëzgjidhjeve të reja, përballë këtyre problemeve të
mëdha që kemi para nesh.