Paraqitet Enciklika ‘Caritas in Veritate”. Kardinali Martino: ofron një vizion inkurajues
për përballimin e krizës.
(07.07.2009 RV)U paraqit sot paradite
pranë Sallës së Shtypit të Vatikanit, në një konferencë, në të cilën morën pjesë një
numër i madh gazetarësh, ardhur nga mbarë bota, Enciklika e re, e shumëpritur, e
Benediktit XVI “Caritas in veritate” - “E vërteta me dashuri”. Gjatë konferencës,
drejtuar nga Atë Federiko Lombardi, u mbajtën katër diskutime kryesore: ai i kardinalit
Renato Rafaele Martino, kryetar i Këshillit Papnor Drejtësi e Paqe; i kardinalit Paul
Jozef Kordes, kryetar i Këshillit Papnor Cor Unum; i imzot Xhampaolo Krepaldit, sekretar
i Drejtësi e Paqe dhe i profesor Stefano Zamanjit, pedagog i Ekonomisë Politike në
Universitetin e Bolonjës dhe këshilltar i të njëjtit dikaster papnor. Enciklika “E
vërteta me dashuri”, është, pra, ftesë për ta thënë të vërtetën me dashuri.
Ka
ardhur koha të bëhet një projekt i ri për qeverisjen e fenomenit të globalizimit,
që të vlerësojë mbi të gjitha, njeriun: ky është mesazhi i theksuar me forcë gjatë
paraqitjes së “Caritas in veritate”. Kardinali Renato Rafaele Martino nënvizoi se
për Benediktin XVI kriza në vijim kërkon të rimendohet modeli ekonomik, i ashtuquajtur
‘perëndimor’. Gjithsesi Papa e lexon realitetin me syrin e besimit në të ardhmen: “Nga
Enciklika buron një vizion pozitiv inkurajimi, që i drejtohet njerëzimit, me besimin
se mund t’i gjejë burimet e së vërtetës e të vullnetit, për t’i kapërcyer vështirësitë”. Kryetari
i Këshillit Papnor të “Drejtësisë e Paqes” ripohoi se “E vërteta me dashuri” vijon
traditën e Enciklikave shoqërore dhe reflekton mbi ndryshimet e mëdha, që janë bërë
gjatë viteve të fundit. Mbi të gjitha, ballafaqohet me ideologjinë e teknikës dhe
me theksimin e fenomeneve të globalizimit, vë në dukje rikthimin e feve në skenën
botërore dhe, së fundi, flet për problemin e qeverisjes ndërkombëtare. Enciklika –
tha kardinali Martino – rikujton e aktualizon vizionin e zhvillimit të gjithanshëm
njerëzor të Populorum progessio, në tre drejtime: në drejtimin e kërkesës për harmoninë
e dijeve, të nevojës për një humanizëm të hapur drejt Absolutit e, së fundi, në drejtimin
e vëllazërimit, për të zhdukur shkaqet e prapambetjes. “Caritas in veritate” -
komentoi më pas kardinali Paul Jozef Kordes, ‘është dritë për shoqërinë’ e
për të krishterët. Ripohon me forcë se njeriu duhet të jetë në qendër të vëmendjes
në çdo përpjekje për zhvillimin njerëzor, pa harruar se Kisha frymëzon, por nuk bën
politikë: “Duke iu rikthyer Populorum Progressio, Enciklika e sotme pohon
qartë: “Kisha nuk ofron rrugëzgjidhje teknike e nuk pretendon të ndërhyjë në politikën
e shteteve”. E kjo do të thotë se doktrina shoqërore e Kishës, nuk është një ‘rrugë
e tretë’, domethënë program politik, që duhet realizuar, për të krijuar një shoqëri
më të përkryer”. Doktrina shoqërore e Kishës – ripohoi Hirësia e Tij –
është “një nga elementet e ungjillëzimit” e, nga ana tjetër, nuk mund ta kufizojë
njeriun në jetën e tij shoqërore. Në Enciklikë – shtoi – vihet në dukje se nuk mund
të ketë zhvillim, pa Zotin, e nuk mund të përballohen çështjet shoqërore, pa u lidhur
ngushtë me çështjen etike. Nga ana e tij imzot Krepaldi vuri theksin tek
përmasa e dhurimit pa asnjë interes dhe pohoi se kumtimi i Krishtit ‘është ndihma
më e madhe, që mund të japë Kisha për zhvillimin”. Prandaj – vijoi – Krishterimi ‘ka
të drejtën e vet të qytetarisë në ambientin publik”. Prej këndej – shpjegoi - në ‘Caritas
in veritate” çështja antropologjike bëhet ‘çështje shoqërore’: “Lindja e
fëmijëve dhe seksualiteti, aborti dhe eutanazia, manipulimet e identitetit njerëzor
dhe përzgjedhja eugjenetike vlerësohen si probleme shoqërore me rëndësi të dorës
së parë që, në se drejtohen sipas logjikës së prodhimit të pastër, përçudnojnë vetëdijen
shoqërore, minojnë kuptimin e ligjit, brejnë familjen, vështirësojnë mikpritjen e
njeriut të ligësht”. Duke iu përgjigjur pyetjeve të gazetarëve, kardinali
Martino foli për reformimin e OKB-së, të cilën Papa e kujton në Enciklikë: “Enciklika
nuk kërkon një mbiqeveri, një qeveri botërore… organizatat aktuale do të duhej ta
kishin këtë autoritet politik botëror. Ja, pra, pse Papa e nxit reformimin e Kombeve
të Bashkuara”. Nga ana e tij, profesor Stefano Zamanji,
duke folur për shoqërinë dhe tregun, u ndalua në mënyrë të veçantë tek parimi i vëllazërimit,
si faktor i rëndësishëm për zhvillimin e vërtetë njerëzor. “Caritas in veritate”,
kjo ftesë e madhe drejtuar mbarë njerëzimit për ta thënë “të vërtetën me dashuri”,
e pa dritën e shtypit në Shtypshkronjën e Vatikanit, në 50 mijë kopje, duke u krijuar
të gjithëve mundësitë ta lexojnë dokumentin papnor në gjuhën latine e në në gjashtë
gjuhë të tjera: italiane, franceze, angleze, gjermane, spanjolle e portugeze. Do të
botohet në të gjitha vendet e botës, përmes Konferencave ipeshkvnore e botuesve të
vendeve të ndryshme. Në Itali, edicioni ekonomik kushton vetëm 2 euro. Ndërkaq Shtëpia
Botuese e Vatikanit ka autorizuar, për botime të veçanta, revistat ‘Famiglia Cristiana”
dhe ‘Tracce’, të përditshmen ‘Avvenire’ dhe të përjavshmet dioqezane. Gjithnjë
Shtypshkronja e Vatikanit po përgatit për shtyp edhe një edicion me komente nga specialistë
të fushave të ndryshme të dijes.