Papa në lutjen e Engjëllit të Tënzot: uroj që në botë të mos rrjedhë më gjak për shkak
të dhunës e të padrejtësive.
(06.07.2009 RV)Gjaku i Krishtit është
peng i dashurisë besnike të Zotit për njerëzimin. Këtë pohoi Papa në lutjen e Engjëllit
të Tënzot, duke shtuar se “britmës për gjakun e derdhur, që lartohet nga shumë vende
të botës, Zoti i përgjigjet me gjakun e të Birit”. E britma e fundit, shkaktuar nga
dhimbja dhe gjaku i derdhur, arrin nga Filipinet, ku një atentat i kryer para Katedrales
së Kotabatos, shkaktoi disa viktima.
Dje, në lutjen e Engjëllit të Tënzot,
Papa e dënoi ashpërsisht atentatin e kryer paradite në Kotabato të Filipineve, ku
shpërthimi i një bombe para Katedrales, gjatë kremtimit të Meshës të së dielës, shkaktoi
disa të vdekur e të plagosur, ndërmjet të cilëve, gra e fëmijë: “Ndërsa lus
Zotin për viktimat e gjestit të ulët - tha Papa - ngre zërin për të dënuar
edhe një herë përdorimin e dhunës, e cila nuk është kurrë rrugë e denjë për zgjidhjen
e problemeve ekzistuese”. Episodi i djeshëm në Filipine, është një faqe e re
dramatike, që i shtohet historisë së vuajtjeve njerëzore. Pikërisht kuptimit të vuajtjes
Benedikti XVI ia kushtoi lutjen e Engjëllit të Tënzot, duke shpjeguar simbolikën e
gjakut në Shkrimin Shenjt. Në Testamentin e Vjetër – kujtoi Benedikti XVI - spërkatja
me gjakun e kafshëve të flijuara përfaqësonte e përforconte besëlidhjen ndërmjet Zotit
e popullit, siç lexohet në Librin e Daljes. Ndërsa në Librin e Zanafillës – shtoi
Ati i Shenjtë – gjaku i Abelit, mbytur nga i vëllai, Kaini, ngrihet nga toka drejt
qiellit, për të lypur gjyq para fronit të Hyjit: “Mjerisht, sot ashtu si dje,
kjo britmë nuk pushon, sepse vijon të rrjedhë gjak njerëzor për shkak të dhunës, të
padrejtësisë, të urrejtjes. E kur më do ta mësojnë njerëzit se jeta është e shenjtë
e i përket vetëm Zotit? E kur do ta kuptojnë se jemi të gjithë vëllezër?”. Këto
pyetje – shtoi Papa – e gjejnë përgjigjen në dashurinë e Zotit: “Britmës për
gjakun e derdhur, që lartohet drejt qiellit nga të katër anët e botës, Zoti i përgjigjet
me gjakun e Birit të vet, që e dhuroi për ne. Krishti nuk iu përgjigj së keqes me
të keqe, por me të mirë, me dashurinë e tij të pafundme. Gjaku i Krishtit është peng
i dashurisë besnike të Hyjit për njerëzimin”. Duke nisur nga fshikullimi me
kamxhik e deri sa vdiq në kryq – kujtoi Ati i Shenjtë – Krishti e derdhi gjithë gjakun
e tij, si ‘Qengj i vërtetë, i flijuar për shpërblimin universal”. Në këtë gjak çdo
njeri mund të gjejë forcë e shpresë: “Duke ia ngulur sytë plagëve të të Kryqëzuarit,
çdo njeri, edhe në kushtet më të skajshme të mjerimit moral, mund të thotë: Zoti nuk
më ka lëshuar dore, më do, dha jetën për mua; e kështu t’i rilindin shpresat e shuara”. Në
përfundim të lutjes, Papa kujtoi edhe tragjedinë e Viarexhos, duke theksuar se merr
pjesë në dhimbjen e atyre që humbën të dashurit, mbetën të plagosur ose pësuan dëme
materiale, edhe të rënda: “Ndërsa lartoj lutjen time drejt Zotit për të gjithë
njerëzit e prekur nga tragjedia, uroj që aksidente të tilla të mos përsëriten e t’u
garantohet të gjithëve siguria në punë e në veprimtaritë e jetës së përditshme”.