Benedikti XVI me ambasadorin e ri të Haitit: thirrje botës për të ndihmuar ishullin
e dëmtuar nga katastrofat natyrore.
(06.07.2009 RV)Të ndihmohet populli haitian, i vënë në provë të rëndë muajt
e fundit për shkak të katastrofave natyrore: këtë thirrje i drejtoi bashkësisë ndërkombëtare
Papa, në audiencën me ambasadorin e jashtëzakonshëm e fuqiplotë të Haitit pranë Selisë
së Shenjtë, Karl-Hanri Gitò, i cili paraqiti sot paradite në Vatikan, letrat kredenciale. Ati
i Shenjtë uroi që mbarë populli haitian të jetojë me dinjitet e siguri e të ndërtojë
një shoqëri gjithnjë më të drejtë e më vëllazërore. Benedikti XVI kujtoi, më pas,
150- vjetorin e Konkordatit – më i vjetri në Amerikë – ndërmjet Selisë së Shenjtë
e shtetit të vogël karaibik, që solli fryte të shumta për Kishën në këtë vend, ku
bashkësia katolike ka gëzuar gjithnjë nderimin e autoriteteve. Më pas Papa kujtoi
me keqardhje të thellë katastrofat natyrore të kohëve të fundit, që dëmtuan rëndë
Ishullin, e posaçërisht uraganet, të cilat shkatërruan prodhimet bujqësore, duke e
rënduar më tej gjendjen e vështirë ekonomike të shumë familjeve. Prej këndej, thirrja
drejtuar bashkësisë ndërkombëtare për t’i ndihmuar konkretisht njerëzit që kalojnë
vështirësi. Por Ati i Shenjtë kujtoi edhe ‘shenjat e shpresës’, që në Haiti nuk
mungojnë e që bazohen mbi vlerat njerëzore e të krishtera, siç janë respekti për jetën,
lidhja e ngushtë me familjen, ndjenja e lartë e përgjegjësisë e, mbi të gjitha, besimi
në Zotin, i cili nuk e braktis kurrë njeriun, që lëshohet në dorë të Tij.