(05.07.2009 RV)Tri ditë në Republikën
Çeke për të kremtuar Shën Vençeslaun, Pajtor i Kombit. Do të jetë kjo ngjarje
e madhe, zemra e shtegtimit të ardhshëm apostolik të Benediktit XVI, që do të ndalohet
për tri ditë, nga data 26 deri më 28 shtatorin e ardhshëm, në Pragë e vende të tjera
të Republikës Çeke. Hollësitë për etapat e veçanta të këtij shtegtimi të ri të Papës,
u bënë të njohura të premten e kaluar nga Salla vatikanase e Shtypit.
Kisha
së shpejti do të ketë një shenjtore e disa të lum të rinj. Pardje, duke pritur prefektin
e Kongregatës për Çështjet e Shenjtorëve, kryeipeshkvin Anxhelo Amato, Benedikti XVI
autorizoi shpalljen e Dekreteve, që kanë të bëjnë me mrekullinë e së Lumes
spanjolle, Kandida Maria e Jezusit Çipitria i Barriola, themeluese e Bijave të Jezusit,
që ndërroi jetë në Salamankë të Spanjës, më 9 gusht 1912, në moshën 67 vjeçare. Dekretet
e shpallura njohin edhe mrekullitë e tre Shërbëtorëve të Hyjit, ndërmjet të cilëve,
mrekullinë e kryer me ndërmjetësimin e kardinalit anglez, Xhon Henri Njumën, themelues
i Oratoreve të Shën Filip Nerit, i kthyer nga anglikanizmi në katolicizëm.
“E
pres me emocion takimin me Papën”- kështu u shpreh, në Shtëpinë e Bardhë, presidenti
i SHBA-së, Barak Obama gjatë një takimi me gazetarët, në një tryezë të rrumbullaktë,
me pjesëmarrje të kufizuar në Uashington. Ndërmjet gazetarëve, e pranishme edhe përfaqësuesja
e Radio Vatikanit, Elena Molinari. Një tur diplomatik me fushë të gjërë veprimi,
i pasur me takime, që do të arrijë kulmin me vizitën private tek Papa e me praninë
në G8 të Akuilës. Këto do të jenë veprimtaritë kryesore të presidentit amerikan, Barak
Obama, gjatë udhëtimit të tij në Rusi, Evropë e Afrikë.
“Meshtari nuk duhet
të ndërtojë një shoqëri të ndryshme, por të kumtojë fjalën e Zotit. Këtë theksoi
Papa në audiencën e përgjithshme të së mërkurës. Frytet që mund të sjellë Viti
Meshtarak dhe thelbi i meshtarisë ishin në qendër të vëmendjes në audiencën e përgjithshme
të Benediktit XVI, mbajtur të mërkurën e kaluar në Sheshin e Shën Pjetrit. Papa ripohoi
vlerën e domosdoshme të lutjes në jetën e çdo të krishteri. Më pas, në përshëndetjen
drejtuar shtegtarëve italianë, nënvizoi rëndësinë e etikës në jetën politike dhe ngriti
me forcë zërin kundër plagës së fajdesë.
Të hënën e kaluar, në solemnitetin
e Shenjtorëve Apostuj Pjetër e Pal, Benedikti XVI kryesoi, në Bazilikën e Vatikanit,
kremtimin e Eukaristisë me disa kryeipeshkvij metropolitë, të cilëve u vuri mbi supe
Palion e Shenjtë. Si çdo vit, në kremtim ishte i pranishëm një delegacion i Patriarkanës
Ortodokse Ekumenike. Papa uroi që “nderimi i përbashkët i këtyre martirëve, të jetë
peng për një bashkim gjithnjë më të plotë e më të ndjerë ndërmjet të krishterëve”.
Pastaj, në lutjen e Engjëllit të Tënzot njoftoi se pak çaste më parë kishte nënshkruar
Enciklikën e tij të tretë, kushtuar temave shoqërore, që do të shohë së shpejti dritën
e shtypit. Enciklika titullohet “E vërteta me dashuri”.Është,
pra, ftesë për ta thënë të vërtetën me dashuri. Papa shpjegoi se në të trajton tematikat
shoqërore, që përmban ‘Populorum progressio’, shkruar nga shërbëtori i Zotit, Pali
VI, në vitin 1967.
Gjatë homelisë, mbajtur në kremtimin e Lutjeve Mbrëmësore,
që shënuan mbylljen e Vitit kushtuar Shën Palit, Papa njoftoi se është bërë një studim
shkencor në sarkofagun e Apostullit të Popujve, duke theksuar se copëzat e
eshtrave, të ruajtura në të, janë pikërisht të Shën Palit.
Kardinali Andrea
Kordero Lanca di Montexemolo ripohoi se rezultatet e para janë vërtetë emocionante.
Të enjten e kaluar, në Sallën e Shtypit të Selisë së Shenjtë u paraqit botimi
i ri i dokumentave të Vatikanit mbi gjyqin e Galileo Galileit, përgatitur nga
Imzot Serxho Pagano, Prefekt i Arkivit Sekret të Vatikanit. Besnikëri e plotë ndaj
akteve origjinale të procesit, kriter rigoroz filologjik, dokumentacion i ri, hyrje
e gjërë për çdo tekst, bibligiografi e besueshme: këto janë disa nga cilësitë e botimit
2009 të dokumenteve të Procesit gjyqësor të Galileo Galileit, pas botimit të vitit
1984, që i parapriu fjalëve të Gjon Palit II për Galileon në 1992. E duhet shtuar
edhe se ndërmjet 1877 e 1910 ka pasur edhe 4 botime tjera. Imzot Pagano e konsideron
edicionin e ri, një “botim të plotë e të besueshëm” pikërisht sepse është tejet besnik
ndaj teksteve origjinale deri në respektimin e shkronjave të vogla e të mëdha.