U paraqit nga Shtëpia Botuese e Vatikanit libri që përmbledh katekizmat e Benediktit
XVI kushtuar Shën Palit.
(01.07.2009 RV)Katekizmat e Benediktit XVI përmblidhen nga Shtëpia Botuese
e Vatikanit në një vëllim të vetëm, të pasuruar edhe me një koleksion ikonografik.
“Shën Pali Apostull” është titulli i librit, që u paraqit dje në Romë, nga kardinali
Gjovani Lajolo, kryetar i Governatoratit të Qytet–Shtetit të Vatikanit, së bashku
me drejtorin e Shtëpisë Botuese dhe drejtorin e Muzeve të Vatikanit. Është vetëm
një, nga botimet e shumta të SHBV për Apostullin e Popujve me rastin e Vitit që
iu kushtua. Libri përmbledh 20 katekizmat e Benediktit XVI kushtuar Shën Palit
– i pari mbajtur më 2 korrik 2008 – i fundmi, më 4 shkurt 2009, për t’i ndihmuar
besimtarët ta njohin më mirë Apostullin e Popujve, dashurinë e tij të pakufishme
për njeriun, shpirtin e tij. Faqja e fundme e këtij cikli mbyllet me rrëfimin e martirizimit
të Apostullit, fund i jashtëzakonshëm, që kthehet në fillim, sepse figura e Shën Palit
– na kujton Papa – i kapërcen kufijtë e jetës dhe të vdekjes e me kalimin e viteve
bëhet aq madhështore, sa të frymëzojë viganë të tjerë të Kishës, nga Shën Agostini,
tek Shën Toma. Katekizmat e plota të Papës kushtuar Shën Palit, të përkthyera në
gjuhën shqipe, që mund t’i lexoni duke hapur faqen tonë të internetit në adresën :
dubël vë, dubël vë, dubël vë.radiovaticana.org, së shpejti do të përmblidhen në një
fletëpalosje, shoqëruar edhe me hollësira të tjera, që kanë të bëjnë me figurën e
Shën Palit në botë e në Shqipëri, duke pasur parasysh se Apostulli i Popujve, është
edhe ungjillëzuesi i fiseve të Ilirisë. E kjo dëshmon se Feja e krishterë tyre dhe
e pasardhësve të tyre, shqiptarëve të sotëm, është me zanafillë apostolike.