Shqipëri: vazhdon numërimi i votave të fundit e gara PD e PS
(30.6.2009 RV)Vijon publikimi i rezultateve nga numërimi i deritanishëm i votave
në të gjitha QV-te. Procesi po shkon drejt fundit, ndërsa të dhënat flasin për një
përplasje të ashpër në qarqet e Beratit, Elbasanit, Fierit dhe Tiranës që do të jetë
vendimtare për forcën politike apo koalicionin që do formojë shumicën parlamentare
në Shqipëri. Në Tiranë Komisioni Qendror i Votimeve bëri të njohur se deri tani
nga rezultatet e pjesshme të numërimit të votave të zgjedhjeve të 28 qershorit del
se partia demokratike e kryeministrit Sali Berisha është fituesja me 46.54 % e ndjekur
nga afër nga partia socialiste e Edi Ramës, e cila ka marrë 45.69 % të votave. Megjithëse
procesi i numërimit ende nuk ka përfunduar, rezultatet e numërimit të 70% të votave
tregojnë se Partia Demokratike e Sali Berishës ka marrë 71 deputetë nga 140 që ka
gjithsej parlamenti shqiptar, ndërsa Partia Socialiste e Edi Ramës, kryetar i bashkisë
së Tiranës dhe Lëvizja Socialiste për Integrim e Ilir Metës kanë marrë 69. E fortë
gara ndërmjet dy partive kryesore veçanërisht në Tiranë dhe në Korçë ku duket se demokratët
dhe socialistët janë në barazim.