Teheran: nuk duam konfliktin diplomatik me Londrën
(29.06.2009 RV)Ulet pak tensioni
politik ndërmjet Iranit dhe Britanisë së Madhe, pas lirimit të 5 nga 9 punonjësit
iranianë të ambasadës britanike, arrestuar dje me akuzën e pjesëmarrjes në protestat
e ditëve të kaluara. Ndërkaq, Këshilli i Rojeve shpalli se ka filluar rinumërimi i
10% të votave. Rezultati duhet të njoftohet brenda 24 orëve. Si kanë reaguar Evropa
dhe Britania e Madhe para akuzave që u ka drejtuar atyre Irani? Të dëgjojmë korrespondentin
e agjensisë italiane të lajmeve ANSA në Teheran, Alberto Xakonato: Reagimi
ka qenë shumë i fuqishëm. Britania e Madhe sulmohet prej ditësh nga autoritetet e
Teheranit, që akuzojnë Londrën se ka organizuar një komplot të vërtetë kundër zgjedhjeve
iraniane. Britania e Madhe përgjigjet se kjo është vetëm një përpjekje për ta larguar
vëmendjen nga gjendja e brendshme. Ekziston një federatë për të drejtat e njeriut
që flet për dymijë të arrestuar e për qindra të zhdukur, persona që akoma nuk dihet
nëse janë arrestuar apo u ka ndodhur diçka tjetër. Pavarësisht nga lajmet
e pakta që mbërrijnë nga Irani, krijohet përshtypja se populli iranian do të vazhdojë
ta kundërshtojë Ahmadinexhadin… Opozita në sheshe, siç u pa javën e kaluar
do të jetë e vështirë, pasi shtypja e protestave ka qenë shumë e egër. Por sigurisht,
do të ketë opozitë politike e sidomos, kandidati i moderuar Musavì vazhdon të thotë
se nuk do ta pranojë rezultatin e zgjedhjeve e madje, nuk do të pranojë as rinumërimin
e vetëm 10% të votave. Ai vazhdon të kërkojë anullimin e plotë të zgjedhjeve. Duke
pasur parasysh se ndeshja është në nivelet më të larta të regjimit iranian, ndërmjet
udhëheqësit suprem Khamenei dhe ish-presidentit Rafsanxhanì, ka mundësi që kompromisi
të jetë i pashmangshëm. Por, deri në këtë çast, akoma nuk shihet ndonjë rrugëzgjidhje.