Mbrëmë Papa foli për rezultatet e një studimi, bërë në varrin e Shën Palit: eshtrat
janë të Shenjtit.
(29.06.2009 RV)Gjatë homelisë,
mbajtur në kremtimin e djeshëm të Lutjeve Mbrëmësore, që shënuan mbylljen e Vitit
kushtuar Shën Palit, Papa njoftoi se është bërë një studim shkencor në sarkofagun
e Apostullit të Popujve, duke theksuar se copëzat e eshtrave, të ruajtura në të, janë
pikërisht të Shën Palit. Ky sarkofag, që nuk është hapur asnjëherë në rrjedhë shekujsh,
kohët e fundit u shpua, për të krijuar kushtet e depërtimit të një sonde të posaçme,
e cila analizoi përmbajtjen e tij. Sipas analizës, në sarkofag u gjetën gjurmë të
një pëlhure liri ngjyrë purpuri, qindisur me ar dukati dhe të një pëlhure të kaltër,
endur edhe kjo, me fije liri. U gjetën edhe kokërrza kemi të kuq dhe lëndë proteinike
e gëlqerore. Por jo vetëm kaq: “Copëzat e vogla të eshtrave, të cilat iu
nënshtruan analizës së karbonit 14 nga ana e specialistëve, pa e ditur nga vinin,
rezultoi se i përkasin një njeriu që ka jetuar ndërmjet shekullit I e II. Kjo duket
se konfirmon traditën e njëzëshme e të pakundërshtuar, sipas të cilës këtu ruhen pikërisht
eshtrat e Palit Apostull. E gjithë kjo e mbush shpirtin tonë me emocion të thellë”.