Kardinali Toran në Turqi për mbylljen e Vitit kushtuar Shën Palit: të krishterët të
jenë dëshmitarë të besueshëm e guximtarë të Jezusit.
(29.06.2009 RV) “Mos harroni se jeni një pakicë nga cila, në këtë vend të madh
e të pasur me histori, të gjithë presin diçka të ndryshme prej jush. Prandaj duhet
të jeni të palëkundur në fe”. E akoma: “Kishat tona nuk janë muze e as të krishterët,
copa antikuariati”. Kështu u shpreh kardinali Zhan-Lyi Toran, kryetar i Këshillit
Papnor për Dialogun Ndërfetar, sot paradite, në Tars, vendlindje e Shën Palit, ku
ishte për kremtimet përfundimtare të Vitit kushtuar Apostullit të Popujve, si i dërguar
i Benediktit XVI. Për të njëjtin qëllim, Hirësia e Tij kremtoi dje në Antioki një
Meshë Shenjte, gjatë së cilës i nxiti të krishterët të promovojnë dialogun e bashkimin. Në
Antioki kremtimet, tejet të thjeshta, u mbajtën në vendet e kultit të dy konfesioneve
të pranishme në qytet: në Oborrin e Misionit katolik dhe në Kishën ortodokse. Liturgjinë
e kryesoi kardinali Toran, në bashkëkremtim me 5 ipeshkvij, me barinjtë maronitë e
filokatolikë dhe me 28 meshtarë. Kardinali shprehu kënaqësinë e tij për bashkimin
e katolikëve e të ortodoksëve rreth Fjalës së Zotit e bukës së elterit të Tij, për
t’i ftuar, më pas, besimtarët katolikë, që jetojnë në Turqi, ta dëshmojnë me guxim
fenë e tyre. Në pëfundim të kremtimit, kardinali, me ipeshkvijtë e meshtarët,
shkoi në Kishën ortodokse, për të marrë pjesë në Lutjet e kënduara Mbrëmësore, kryesuar
nga Patriku Ekumenik ortodoks, Bartolomeu I. Solemn edhe kremtimi i Tarsit, me
praninë e 6 ipeshkvijve e të 60 meshtarëve. Gjithsesi, edhe gjatë ceremonisë, u ndje
fort shqetësimi për ardhmërinë e Kishës, ndërtuar në qytet për nder të Shën Palit:
do t’i besohet Vikariatit apostolik të Anatolisë, siç është premtuar disa herë nga
autoritetet kombëtare e lokale, apo do të vijojë të mbetet muze? “E kërkojmë edhe
një herë – tha imzot Luigji Padoveze, vikar apostolik i Anatolisë - sepse Tarsi, pas
Shenjtërores mariane të Meryem Ana të Efezit, është bërë vendi i dytë i shtegtimeve
në Turqi, e sidomos, sepse është vend kulti për katolikët. Në se do të vijojë të
mbetet muze, shtegtarët katolikë nuk do të kenë vend për kultin e tyre e mund edhe
ta shlyejnë Tarsin nga lista e shtegtimeve të tyre”. Përgjigjja përfundimtare për
fatin e Kishës do të jepet nesër, e mbarë katolikët e botës urojnë që të jetë pozitive.