(24.06.2009 RV)Kryeministri izraelit,
Benxhamin Netanijahu ka filluar që dje vizitën në Evropë, në kërkim të konsensusit
për propozimet e tij përsa i përket procesit të paqes në Lindjen e Mesme. Dje në Itali,
Netanijahu deklaroi se paqja do të arrihet, nëse do të dobësohet regjimi i Teheranit.
Sot, ai ndodhet në Francë, ku ka anulluar takimin e nesërm me të dërguarin personal
të presidentit amerikan Obama për Lindjen e Mesme, Xhorxh Miçëll. Mbetet pra akoma
i lartë tensioni ndërmjet Izraelit e SHBA-ve, pas kërkesës së administratës Obama
për pezullimin e ndërtimeve në kolonitë hebraike të Çisjordanisë. Miçellin do ta takojë
të hënën në Uashington lideri laburist izraelit, Barak, përgjegjës për Çisjordaninë.
Por për turneun evropian të Netanijahut të dëgjojmë komentin e profesoreshës së
historisë dhe të institucioneve të Lindjes së Mesme në Universitetin e Bolonjës, në
Itali, Marçela Emiliani: Qëllimi që ka (Netanijahu) është të krijojë konsensus
rreth planit për pranimin e një shteti palestinez, por të çmilitarizuar, gjë që refuzohet
nga palestinezët, pasi një shtet i çmilitarizuar do të thotë se heq dorë nga sovraniteti
i vet. Kam përshtypjen se Netanijahu po kërkon në Evropë, atë që i mohohet nga administrata
amerikane, e vendosur të punojë për krijimin e një shteti palestinez sovran. Duke
parë se ç’po ndodh në Iran, me zgjedhjen e manipuluar të presidentit Ahmadinexhad,
Netanijahu ka ndërmend të koalizojë një grup shtetesh, që ta konsiderojnë Iranin si
më të rrezikshmin në zonë.