Papa në audiencën e përgjithshme flet për Vitin Meshtarak dhe bën thirrje për lirimin
e pengjeve të luftës.
(24.06.2009 RV)Në audiencën e sotme
të përgjithshme, Papa bëri thirrje për lirimin e Eugjenio Vanjit dhe të gjithë njerëzve
të rrëmbyer në zonat e luftës. E sot, që kremtohetditëlindja e njërit nga
shenjtorët më të nderuar të Kishës katolike, Shën Gjon Pagëzuesit, Benedikti XVI shpjegoi
arsyet e shpalljes së një viti të veçantë, kushtuar meshtarëve, Vitit Meshtarak.
E, para se të ndahej me besimtarët e shtegtarët e shumtë, mbledhur në Sheshin e Shën
Pjetrit për audiencën, Ati i Shenjtë kujtoi se 150 vjet më parë lindi ideja për
themelimin e Kryqit të Kuq ndërkombëtar dhe u shprehu afërsinë e tij të gjithë fëmijëve,
viktima të dhunës në botë.
“Uroj që njeriu, me dinjitetin
e me të gjitha vlerat e veta, të jetë gjithnjë në qendër të vëmendjes në impenjimin
humanitar” – kështu u shpreh Papa, duke rikujtuar idenë për një mobilizim të madh
e të përgjithshëm, në ndihmë të viktimave të luftës, që pati zvicerani Hanri Dynant
gjatë betejës së Solferinos, më 24 qershor 1859, nga e cila lindi, më pas, Kryqi i
Kuq ndërkombëtar. Prej këndej, Benedikti XVI i inkurajoi të gjithë, posaçërisht të
rinjtë, të impenjohen konkretisht për t’i dhënë ndihmesën e tyre këtij institucioni
të mirënjohur. Më pas, thirrja: “Përfitoj nga kjo rrethanë për të kërkuar
lirimin e të gjithë njerëzve të rrëmbyer në zonat e konfliktit e, edhe një herë, lirimin
e Eugjenio Vanjit, punonjës i Kryqit të Kuq në Filipine”. Më pas, duke
iu drejtuar delegacionit të OKB-së, kryesuar nga Radhika Komarasuami, zevendës-sekretar
dhe përfaqësues i posaçëm për fëmijët në situata konflikti, i pranishëm në Sheshin
e Shën Pjetrit, Benedikti XVI kujtoi të gjithë fëmijët që vuajnë, që lihen në mëshirën
e fatit, që dridhen nga frika, kanë uri, vuajnë nga sëmundjet e vdesin pa iu rritur
mirë shtati: “Papa është pranë gjithë këtyre viktimave të vogla e i kujton
gjithnjë në lutje”. Në katekizëm, Ati i Shenjtë shpjegoi arsyet e shpalljes
së një viti të posaçëm kushtuar meshtarëve, të cilin e përuroi më 19 qershorin e kaluar,
për kujtim të Shën Gjon Maria Vianejt, Famullitarit të Arsit, vdekur 150-vjet më parë.
Po kush ishte Shën Gjon Vianej? Kësaj pyetjeje iu përgjigj Papa gjatë katekizmit,
që kishte në qendër të vëmendjes pikërisht këtë katundar të varfër, që u bë famullitar
i përvujtë në një fshat të vogël të Francës e që, në dukje, nuk bëri asgjë të jashtëzakonshme.
Por në se thellohemi në jetën e tij, do të vërejmë se, ashtu si Shën Pali, ai diti
të jetonte në bashkim të plotë me Krishtin e ta kryente misionin e bariut të shpirtrave,
si të ishte vetë Bariu i Mirë. Tërë jetën u përpoq të arrinte përsosurinë shpirtërore.
E këtë duhet ta kenë mirë parasysh të gjithë meshtarët e kohëve tona, që të jenë “shërbëtorë”,
e jo ‘pronarë’ të Fjalës ungjillore: “Në një botë, në të cilën
vizioni i përgjithshëm i jetës e përfshin gjithnjë më pak shenjtërinë, në vend të
së cilës vë ‘fuksionalitetin’, që bëhet kategoria e vetme e kryesore, ka rrezik që
koncepti katolik i meshtarisë ta humbasë kuptimin e natyrshëm, nganjëherë edhe brenda
vetëdijes kishtare”. Papa vijoi të shpjegonte se në mjediset teologjike,
ashtu si dhe në praktikën baritore, vihen ballpërballë e nganjëherë edhe kundërvihen
dy konceptime të ndryshme të meshtarisë: ai shoqëror-funksional, i bazuar mbi konceptin
e shërbimit ndaj bashkësisë e ai sakramentor-ontologjik i cili, pa e mohuar shërbimin,
e shikon meshtarinë si dhuratë që jep Zoti përmes Kishës. E tregon këtë vetë fjala,
që ka kuptimin ‘shërbim, minister, detyrë’. Nuk janë koncepte që i kundërvihen njëri-tjetrit
– sqaroi Benedikti XVI – atje ku tensioni, ndonëse ekziton, zgjidhet brendapërbrenda:
“Famullitari Shenjt i Arsit përsëriste shpesh me lot në sy: “Sa e tmerrshme
është të jesh prift! E shtonte: “Sa ia qaj hallin priftit, që e kremton Meshën si
të ishte një gjë e zakonshme! Sa fatkeq është prifti pa jetë shpirtërore!”. Uroj
që Viti Meshtarak – tha në përfundim Benedikti XVI – t’i nxisë të gjithë meshtarët
të bëhen një me Krishtin e kryqëzuar e të ngjallur.