Vijojnë në Iran protestat kundër Ahmadinexhadit dhe votimeve të parregullta.
(23.06.2009)Votimet presidenciale
në Iran janë të rregullta dhe nuk do të përsëriten. Kështu vendosi Këshilli i Rojeve,
organi suprem ligjvënës në Iran. Sipas këtij këshilli Ahmadinexhadi ka fituar këto
zgjedhje me 62,63 % ndërsa Musavi ka marrë vetëm 33,75% të votave. Rezultate këto
që çuditën ekspertët të cilët prisnin që fituesi të ishte pikërisht Musavi. E ndërsa
mjetet zyrtare të shtypit njoftuan se Ahmadinexhadi do të bëjë betimin për mandatin
e dytë në një datë që shkon nga 26 korriku deri nga 19 gushti, në vend vazhdojnë protestat
masive. “Protestat në Iran janë fillimi i ndryshimeve”. Kështu u shpreh për shtypin
zëdhënësi i Shtëpisë së Bardhë Robert Gibs, cili nuk harroi të nënvizojë se ndonëse
presidenti Barak Obama po i ndjek me vëmendje zhvillimet e fundit nuk do ta mbështesë
grevën e përgjithshme organizuar nga opozita në Iran. Dënim për dhunën në Iran
kanë shprehur edhe shtete e organizma ndërkombëtare. Përfaqësuesi i Lartë i Politikës
së Jashtme të BE-ian Havier Solana shprehu mospajtim me dhunën e ditëve të fundit
në Teheran. “Prisnin që zgjedhjet në Iran të ishin diçka që do të çmohej nga bashkësia
ndërkombëtare. Fatkeqësisht ajo që pamë qe diçka krejtësisht e ndryshme” tha për gazetarët
Solana. Po ashtu kritika për situatën e krijuar në vend shprehu edhe Sekretari
i Pergjithshem i OKB-së Ban Ki Mun, i cili u bëri thirrje autoriteteve iraniane që
të ndalohen arrestimet, kërcënimet dhe përdorimi i dhunës. Pikërisht për këto kërkesa,
Teherani e akuzoi Ban Ki Mun se po ndërhyn në punët e brendshme të këtij shteti. Gjithashtu
për gjendjen e krijuar Irani akuzoi në veçanti dy mjete informacioni, radion Zëri
i Amerikës për Persinë dhe BBC, se janë frymëzuesit dhe nxitësit e demonstruesve. Ndërkaq
Suedia dhe Franca thirrën sot ambasadorët e tyre në Iran duke shprehur kështu shqetësim
për situatën në vend.