(23.06.2009 RV)Presidenti i Somalisë Ahmad Sharif, duke parë gjendjen e vështirë
krijuar nga luftimet ndërmjet forcave qeveritare dhe rebelëve islamikë në periferi
të Mogadishos, shpalli gjendjen e jashtëzakonshme. Lajmi u dha gjatë një konference
për shtyp. “Duke filluar nga sot vendi është në gjendje të jashtëzakonshme”, tha për
gazetarët presidenti Sharif. Më pas ai e krahasoi gjendjen në Somali me atë në Pakistan.
“Edhe vendi ynë është viktimë e terrorizmit ndërkombëtar sikurse edhe Pakistani. E
nëse një vend si Pakistani nuk arriti ta zgjidhë çështjen e terrorizmit vetë, si do
të mundemi vallë ne, pa pasur ndihmën ndërkombëtare?” deklaroi për shtypin presidenti
i Somalisë. Ndërkaq Ministria Mbrojtjes e Hollandës lajmëroi se sot piratët somalë
liruan anijen holandeze Marathon dhe ekuipazhin e saj prej tetë marinarësh ukrainas.
Gjithashtu u bë e ditur se një nga anëtarët e ekuipazhit u gjet i vdekur. Anija ishte
marrë peng më 7 majin e kaluar.