(22.06.2009 RV)Afrohen zgjedhjet
politike në Shqipëri. Një javë para 28 qershorit, kur shqiptarët do t’u afrohen kutive
të votimit, partitë vazhdojnë fushatën zgjedhore, duke bërë premtimet e zakonshme
për mirëqënie e salltanete, që akoma nuk shihen, edhe pas 16 vjetësh demokraci. E
nuk është e sigurtë që edhe ndryshimet e bëra deri tani, nëse nga njëra anë kanë derdhur
para në arkën e shtetit dhe në xhepat e afaristëve e të politikanëve, nga ana tjetër,
të kenë siguruar edhe përparimin e vërtetë të vendit. Gjithsesi, si gjithnjë para
zgjedhjeve, politikanët bëjnë punën e tyre, duke thirrur në ndihmë edhe homologët
e tyre jashtë shtetit. Kështu, Senati Amerikan ka miratuar një rezolutë, përmes së
cilës njeh arritjet demokratike të Shqipërisë. Por senatorët amerikanë nuk harrojnë
të bëjnë thirrje për një proces zgjedhor të besueshëm si për popullin, ashtu edhe
për partnerët e jashtëm. Mesazhi ripropozohet nga Presidenti i Republikës, Bamir
Topi, i cili kërkon që në ditët e fundit përpara zgjedhjeve, të ruhet klima e qetë
dhe të sigurohet një proces zgjedhor pa probleme. Ndërkaq, koalicioni qytetar për
një “Parlament të pastër”, i kryesuar nga ish-presidenti Alfred Moisiu, publikon listën
e kandidatëve jo të denjë për t’u zgjedhur në Kuvendin e ardhshëm. Janë 21 kandidatë,
5 prej të cilëve të Partisë Republikane, 4 të PD-së dhe PDK-së, 3 të Partisë Socialiste
dhe nga një në listat e pesë partive të tjera. Kjo do të thotë se nga 165 emrat e
propozuar për garën e 28 qershorit, 15% rezultojnë të papërshtatshëm për të qenë përfaqësues
të qytetarëve në legjislaturën e ardhshme.