Më 4 korrik do të përurohet Kapela e restauruar e Shën Palit.
(21.06.2009 RV)Të shtunën, më 4
korrik, Benedikti XVI do të përurojë Kapelën mikelanxholeske kushtuar Shën Palit,
së cilës iu kthye bukuria e dikurshme, pas shtatë vjet punimesh, të kryera me pasion
e mjeshtri. Njoftimin e jep drejtori i Muzeve të Vatikanit, Antonio Pauluçi, në
një artikull, botuar në gazetën vatikanase ‘L’ Osservatore Romano”, ku përshkruan
fazat e ndryshme të punimeve pesë vjeçare, kryer prej skuadrës, drejtuar nga Mauricio
De Luka. Pikërisht këtu Benedikti XVI do të kremtojë Lutjet e para Mbrëmësore
të së dielës XIV të kohës së zakonshme gjatë vitit kishtar, pak pas 29 qershorit,
kur do të mbyllet Viti kushtuar Apostullit të Popujve. E ishte pikërisht ky afati
i paracaktuar për përfundimin e restaurimit, që u respektua plotësisht, falë shpejtimit
të punimeve gjatë vitit të fundit. Kapela, kushtuar Shën Palit, vend privat kulti
në Pallatin Apostolik, i rezervuar për Papën e për familjen papnore, siç quhen njerëzit
që i qëndrojnë më pranë Atit të Shenjtë, nisi të ndërtohej nga Papa Pali III Farneze
i cili, për realizmin e saj, ngarkoi arkitektin e famshëm italian Antonio da Sangallo,
shumë aktiv gjatë Rilindjes e Manierizmit. Arkitekti i porositi Mikelanxhelos dy
afreske, të vëna përballë, që paraqesin Kthimin e Saulit dhe Kryqëzimin e Shën Pjetrit,
dy kryevepra, të cilat meritojnë vëmendjen jo vetëm të atyre që besojnë në Zotin,
por edhe në bukurinë e krijuar prej Tij. Në këto kryevepra, me ndikim mbi të gjitha
veprat e artit realizuar më pas në Kapelë, historia bëhet figurë e figura, teologji
e gjallë, e prekshme, tejet e kuptueshme edhe për njeriun që nuk e ka lexuar kurrë
Shkrimin Shenjt. Në një farë mënyre - shpjegon Pauluçi – Kapela kushtuar Shën
Palit, më shumë se ajo Sikstine, është vendi që simbolizon misionin e Kishës Universale.
E, kur i Shenjtnueshmi Sakrament është jashtë, mbi elter, theksohet edhe më shumë
mesazhi teologjik, që ruhet e shpallet nga Papa i Romës, rojtar i Korpit të Krishtit,
në vazhdmësi të ligjshme apostolike e në besnikëri ndaj saj.