Papa kardinalit Kasper për mbylljen e Vitit kushtuar Shën Palit: të përsëritet lutja
për bashkim.
(20.06.2009 RV)Benedikti XVI ia
besoi kardinalit Valter Kasper, kryetar i Këshillit Papnor për Bashkimin e të Krishterëve,
i dërguar i tij i posaçëm, kremtimet për mbylljen e Vitit kushtuar Shën Palit në Tokën
Shenjte, më 29 qershorin e ardhshëm. Në një Letër, që u bë e njohur sot, Papa shpreh
gëzimin me të cilin i jetoi vizitat baritore në viset e Shën Palit, ku do të shkojnë
edhe të dërguar të tjerë nga ana e tij, për të marrë pjesë në liturgjitë me të cilat
do të mbyllet Viti kushtuar Apostullit të Popujve. Në Liban do të shkojë kardinali
André Vënt Trua, kryeipeshkëv i Parisit; në Siri, kardinali Antonio Maria Roko Varela,
kryeipeshkëv i Madridit; në Turqi, kardinali Zhan–Lyi Toran, kryetar i Këshillit Papnor
për Dialogun Ndërfetar; në Greqi, kardinali Jozef Tomko, prefekt nderi i Kongregatës
për Ungjillëzimin e Popujve; në Qipro, kardinali Renato Rafaele Martino, kryetar i
Këshillit Papnor të Drejtësisë e Paqes; në Maltë, kardinali Enio Antoneli, kryetar
i Këshillit Papnor për Familjen. Edhe në trojet shqiptare, të ungjillëzuara nga
Shën Pali, më 29 qershor do të mbyllen kremtimet e Vitit kushtuar Shën Palit: në kateralen
e Tiranës, që e ka pajtor Apostullin e Popujve, do të mbahet një kremtim solemn eukaristik;
ndërsa në Kosovë do të kremtohet në Kishën e Gjakovës, kushtuar Shën Pjetrit e Shën
Palit. “I lumi Shën Pal, Apostulli që tha ‘Për mua të jetoj është Krishti e të
vdes është fitim’, sepse mbeti për ne shembull i shkëlqyer, që na tregon si duhet
dashur Zoti e si duhet bërë vullneti i Tij, në shërbim të Hyjit e të Kishës” - ky
është një nga fragmentet e Letrës, që Papa i drejtoi kardinalit Kasper, i cili do
të jetë i pranishëm gjatë kremtimit në Tokën Shenjte, duke theksuar vlerën e doktrinës
së Apostullit të Popujve dhe nxitjen e tij për shpëtimin e mbarë njerëzimit. Papa
i siguron besimtarët e Viseve Shenjte se lutet për ta e u jep të gjithëve, bekimin
e tij apostolik.