Protestat në Iran vazhdojnë. Opozita nuk tërhiqet dhe bën thirrje për manifestime
të tjera.
(18.06.2009 RV)Protestat në Iran
hynë në ditën e gjashtë. Veshur me të zeza, në shenjë zije për shtatë të vrarët nga
policia në ditët e kaluara sipas thirrjes që kishte bërë udhëheqësi i opozitës Musavi,
manifestuesit dolën rishtas sot në rrugët e Teheranit. Gjithashtu Musavi i kishte
kërkuar të pranishëmve që të protestonin në heshtje dhe pa hedhur parrulla. Ndërkaq
Këshilli i Rojeve sulmoi “armiqtë e Iranit që përpiqen të shkaktojnë turbullira në
vend” të cilët, sipas këtij organi suprem iranian, “janë të zemëruar ngaqë pjesëmarrja
e popullit në votime të premten e kaluar ka qenë shumë e lartë”. Gjithashtu Këshilli
i kërkoi katër kandidatëve Ahmadinexhad, Musavi, Karrubi dhe Rezai – që të shtunën
të paraqiten për të shqyrtuar mënyrën e rinumërimit të pjesshëm të votave. Njoftohet
se për shkak të protestave deri tani kanë përfunduar në pranga afro 500 vetë, ndër
të cilët ka njerëz të zakonshëm por edhe koka si intelektuali Ibrahim Jazdi. Policia
islamike i bëri thirrje anëtarëve të saj që nesër të marrin pjesë në lutjen e madhe
drejtuar nga udhëheqësi suprem Ali Khamenei. Fillimisht Khamenei e bekoi fitoren e
Ahmadinexhadit ndërsa tani duket se e ka ridimensionuar pozicionin e tij. Gjithashtu
sot Shoqata e Besimtarëve Luftëtarë, organizatë fetare progresiste kjo, u rreshtua
përkrah opozitës. “Për të kuptuar se cili mund të jetë përfundimi i këtyre protestave
duhet të dish se me kë do të bashkohen udhëheqësit fetarë të qytetit të Komit.” Kështu
shprehet për situatën në Iran gazeta amerikane Nju Jork Tajms. Deri tani mullahët
e qytetit Kom, nuk janë përfshirë në situatën e krijuar. “Një nga misteret e kësaj
lëvizjeje është se kush po e organizon atë”, shkruan e përditshmja amerikane, sipas
së cilës mendohet se organizatori është Ali Akbar Rafsanxhani, kryetar i Asamblesë
së Ekspertëve, një grup 86 personash, i cili ka kompetencë të shkarkojë nga detyra
madje edhe udhëheqësin suprem. Në zgjedhjet presidenciale të 2005, Ahmadinexhadi pati
fituar pikërisht kundër rivalit Rafsanxhani. E ndërkaq, sot pasdite, ambasada iraniane
në Bruksel, nxorri një notë në të cilën thuhet se “mbështetja që u jepet manifestuesve
në Iran nga jashtë është e pajustifikueshme”. Pasi i quan manifestuesit “agjitatorë”
dhe “anarkikë” ambasada në notën e vet thotë se mundësia e manipulimit të zgjedhjeve
në Iran është pothuajse e barabartë me zero, falë kjo sistemit të kontrollimit të
votimeve.